探險家攻略 > 城中探秘 / 旅遊 > 其他 / 長線旅遊 > 小倉。門司港﹑潮風號﹑885系列車

小倉。門司港﹑潮風號﹑885系列車

由平凡人於 2015-04-20 21:10:00 發表 | 累積瀏覽 1151

分類：長線旅遊其他；地區：九州

< 福岡﹑熊本﹑小倉﹑長崎5天遊 >

第三天（續）

欣賞左博多燈會唔夠兩個鐘就要趕住離開呢個咁靚既地方，冇辦法啦book唔到博多住宿，唯有住得遠一啲住到去小倉；小倉係九州東北面，距離博多唔算好遠，坐新幹線只需16分鐘就可以到達，而坐特急列車大約45分鐘；本來我冇計劃去小倉架，所以對呢道冇咩認識，只係諗住隨便係道住一晚咋


再次去到博多站等車；博多同小倉之間既山陽新幹線唔包係火車pass之內，所以今次只可以搭普通列車

月台之上有細細間拉麵店，企係道食我諗幾分鐘就可以食完一碗

我係因為見到呢部機先知道「替玉」係加麵既意思，真係大鄉里

話咁快有車到啦，今次坐885系「白色音速」特急列車，部車睇落好新好靚，個樣仲好似德國ICE3同中國CRH3列車

外面睇又新又乾淨



指定席座位好正，係大大張皮造座椅



放好車飛，我都唔行來行去啦，舒舒服服坐定定休息下仲好



大約45分鐘之後去到小倉啦

小倉站月台都有得賣火車便當，一路坐車一路食就岩晒



指定席坐唔滿，相反自由席就企左好多人

唔係道慢慢睇火車啦，我都要快啲趕路去住宿地方check in先，雖然已經講左夜少少先到，但都係唔好要人地等太耐

小倉站係一個大火車站，不過唔洗擔心唔識路，指示好清晰，而且主要都係得南北兩個出入口



小倉冇地鐵，但就有單軌列車行走，而我住既地方只係需要搭一個站，所以都係決定行過去，唔洗上上落落可能仲快過搭車

小倉站附近都係一啲大商場



行15分鐘就已經去到hostel所在地，只係因為hostel係大廈樓上比較難發現，睇坐google map黎行都要轉左兩個圈先見到；Hostel所在地「堺町」我估係一個比較複雜既地方，由我踏入堺町開始見到好多無料案內所﹑夜總會等等，而且仲有過百人企係街頭拉客，想搵夜生活去呢道一定冇錯；見到咁既情況為免比人打我都唔敢拎相機比來影相，如果女仔夜晚黎呢道就要留意啦，我一路行一路不停比人推銷，可惜呢道負責企街拉客既係男人，所以冇靘遇，哈哈^^

終於見到hostel水牌，我係今日最後入住既客人，要人地等真係唔好意思

Hostel入面都唔錯，而且服務好好，check in後有專人帶領去自己房間，仲會帶住介紹全間hostel設施，而且帶我既職員係一個好靚既台灣女仔黎架XD

Hostel樓下有人企街拉客

上半身裸？只係睇中文字意思好奇怪

我間房就係呢條走廊

走廊另一邊有間鋪頭，唔知點解覺得好神秘

呢張就係我張床啦，岩晒自閉；返到自己張床好快就訓著左lu，今日行左咁多路已經好攰，晚安^^

不過相機差電時有少少問題，原來插左線差電係唔可以開機睇相，一開機就變成咁輕左機10分鐘，我仲以為相機壞左...不過呢部相機電池好耐用，說明書話可以影到大約四百張相，我就影到六百幾張先冇電，超出預期

第四天

今日要離開小倉去好多地方，一早七點就要出發啦，放低條鎖匙就可以走



而家先睇到hostel有咁大個招牌係樓下，我住既就係「Fukuoka Guesthouse Little Asia Kokura」

朝早堺町同夜晚差好遠，人影都唔多個



睇啲招牌隱約估到係咩地方



¥3000唔知有咩玩呢？

今日時間緊迫，要快啲行去火車站；出到大街跟住路軌行好快就可以返到小倉站



第一次見到單軌列車真面目



事不宜遲，快啲行入去



小倉站晨咁早就開始有萬聖節活動



唔理咁多啦要快啲入閘坐火車



既然一場黎到小倉，如果咩都唔睇只係住一晚就走好似有少少可惜，咁我就用少少時間去「門司港」睇下風景啦



由小倉坐車大約20分鐘可以到達門司港

門司港火車站係九州鐵路起點，亦都係九州最古老火車站，已經有超過一百年歷史；以前門司港因為同對面本州近，可以話係來往本州九州必經之路，而且門司港亦都曾經係工業﹑經濟中心，以前係好繁榮，不過自從本州九州有陸路連接之後，往來既人唔再需要經過門司港，門司港亦都變得寧靜



諗左好耐都唔知啲車係點可以上到去？

門司港保留左好多好靚既歐洲風格建築


有好靚既海



本州九州中間既「關門大橋」，連接本州下關與九州門司港



有條可以升起既橋，夠鐘就會自動打開



海邊環境又靚又舒服



對岸就係本州下關，呢道可以坐船過去，不過我就冇時間去啦；下關碼頭旁邊有一個好出名既「唐戶市場」，可以食到新鮮海鮮同當地好出名既海豚，不過我都唔食海鮮所以吸引我唔到，哈哈^^

睇完咁靚既海返到火車站旁邊，呢道有一條小火車路線，好岩喜歡火車既朋友



就係呢部「潮風號」！不過我一來冇時間，二來覺得部車個樣唔係咁靚，所以就唔會坐啦，影幾張相留念算lu...冬天潮風號係唔會運行，想坐就要岩時間



門司港係一個火車迷好地方，呢道仲有九州鐵道記念館，岩晒火車迷朝聖



我就唔係火車迷，而且都冇咁多時間，咁就唔入去睇啦，留返多啲時間睇風景仲好；係門口望望入面既蒸汽火車當去左啦，哈哈XD

入面有得玩揸火車，大人唔知迫唔迫得入呢？

返到門司港站，車站廁所都保留住舊時風格，唔講仲以為返左古代

來到門司港好短時間就要離開，呢世人都唔知有冇機會再返黎啦...

呢道基本上部部車都可以返到小倉，見到左邊呢部開住門就上車lu

呢部係快速列車，經小倉博多等等地方去荒尾（我都唔知荒尾係邊！）

座位比起特急列車當然差好遠，冇咁大同冇咁舒服，不過都ok啦



去到九州唔同地方都可以見到呢個廣告

火車話咁快就返到小倉，見下一班去博多既特急列車仲有20分鐘先開，咁我都懶得行上行落啦，唔落車直接坐呢部車返博多，心諗叫得快速列車速度都唔會好慢，最後返到博多時部特急係追到我呢班車...

有人係月台咁樣賣便當，覺得好神奇又傳統

終於返到博多啦，博多站大堂介紹緊呢部超豪華列車「ななつ星in九州」，豪華程度係好誇張，唔係我可以坐得起......

出左火車站就要趕路去今晚住既地方check in，今晚都唔知幾點先返到來唔早啲check in我怕門口都冇得入



經過琴晚去過既東長寺

仲見到好多未開門既屋台



行左15分鐘就去到今晚住既地方「中今民宿/Guest House Nakaima」，check in後野都冇放低就要趕路返火車站



傳說中好平既薩莉亞！日本店鋪整到咁靚，香港個啲就咁普通...

而家已經係十二點半，今日忙到連早餐都未食，路過7-11就入去買定個飯團一陣上車慢慢食

返到來博多站就代表好快去下一個地方啦

其實今日目的地係去長崎，不過因為今朝用左時間去門司港所以留係長崎既時間得返唔係好多咋，而且由博多去長崎車程比較長，要大約兩個鐘，所以係長崎活動既時間就更少，今日下午要繼續趕路啦

鐘意SeeWide的分享，給我們一個Like吧！