上環摩羅街「幸福玩具店」, 一間我經過三次也無緣與店主阿輝聊天的店舖, 今日我的幸福時刻終於降臨, 我又可以接觸久違了的童年玩具啦!!

 

「幸福」的老闆阿輝, 當年是舊音響發燒友, 話說1987年某日, 行經一音響店, 有人放了一隻「雞生蛋」的鐵皮玩具, 從此便改寫了阿輝的嗜好.

「雞生蛋」的尾部有一個位, 是放雞蛋, 阿輝:「我無攞到D雞蛋出嚟呀!!」(哎呀!!好好玩咁喎...我好想玩呀!!)

阿輝在店內最有感情, 又屬非賣品的, 就是這輛7號鐵皮車, 「你唔覺得個人啲手手腳腳縮埋入部車, 只係得返個頭凸出嚟, 好靚好得意咩??」(係, 好似被Hulk打了入去一樣....)

還有三部單車, 看到那小朋友的「得戚」表情 , 已經很想打他, 不過這三件玩具, 原來其中兩件又是阿輝的私人珍藏, 只看不賣的.

阿輝說:「只有最右(60年代噹噹)嗰款我先賣架, 其實當年因為太多人擁有過, 不過, 另外兩部同款小朋友, 反而係後期, 70年代物, 我覺得造到好有小朋友氣氛, 你覺唔覺得?? 我唔賣架」

今日我學識「得戚」小朋友的生產原料叫「賽璐珞」, 質地似雞蛋, 非常易碎, 所以小朋友的左手離開了車把, 我們也不敢重新放回上去...

1998年, 阿輝與朋友工娛時間於銅鑼灣銀座商場地庫, 一玩又玩了數年, 後來因為商場漏水, 所以才搬走. (我記得呀...當年你哋成日都唔開嘅)

阿輝說, 最難收藏便是食物包裝的玩具, 因為過期定必遭人棄掉, 而全店就只有這個聖誕老人型的糖果膠樽. 「80年代士多買架, 啲糖你一食包你中毒...」(我身體咁孱, 食啲過期嘢即痾, E筒糖我食完應該即死)

 

當年香港山寨玩具, 以脆膠玩具生産最少, 他們主力向屋村兜售, 售價不能昂貴, 阿輝指:「咁Cheap嘅玩具先最難搵, 當年小朋友要買都買跑車啦, 點會買咁核突嘅公仔呀??」

當年最難討人歡心的, 便是今日的經典, 這4吋的膠女孩, 今日售價300元, 而且更驚人的是... 阿輝在1997年, 曾經以千多元, 於摩羅街買過一隻類似的膠女孩...(觸目驚心都O嘴, 我完全畀唔到反應...)

2008年阿輝終於達成他的全職玩具夢, 於摩羅街開玩具店, 取名「幸福」, 因為童年時有玩具玩的小朋友, 一定是其他小朋友心目中最幸福的人.

Sony仔是幸福售價最高的一件玩具, 輝指商品玩具已經沒有人再玩, 「死過條臘腸」, 不過原來這是台灣製造的版本. (我10年前都有儲, 當年用$600買了一個細三份二的Sony仔, 不過之後無再買, 轉玩超合金)

8音木鍵小鋼琴, 60年代大陸出產, 當年女孩子的必有玩具, 琴面的小白兔是大陸標準口面, 拿上手阿煇竟然說:「我仲記得十幾年前係北角買, 不過幾錢就唔記得咗」

十年前堅道「發利隆」玩具批發結業, 便是阿煇一眾老友收藏家集體「執到寶」的最後一次 , 「之後我都無再入過貨喇, 根本都無得你買啦, 玩具舖執得就執, 文具舖都無晒啦」

回想我亦有最後一次執到寶經驗, 1999年界限街橋底玩具店, 好懷念... $98一盒Sailor Star變身器, 之後玩具舖又結業, 變了有機生果店.

原來當年玩具達人入貨地點, 來來去去也是只有十間八間, 當中包括堅道, 北角, 而最多寶物的地方便是秀茂坪, 「拆晒啦...即係E家寶達邨, 巴士總站附近嗰頭囉」(回憶總是美好, 我都心痕痕好想尋寶呀!!)

喜愛收集豬仔的阿輝說:「E件50年代玩具, 人駕豬豬...其實係歧視黑人嘅...(有豬駕喎...), 你唔好用E家眼光, 60年前, 好人好姐點會駕住隻咁低等嘅動物吖?? 」(係喎, 真係玩具都有咁大含意喎!)

希望可以將香港玩具介紹給更多人認識, 阿輝說, 不想大家也偏重日本玩具, 因為香港玩具一樣好好玩.

原來愈原始, 模仿得真實事物最似的, 便會是最有趣的玩具, 所以本來是一隻雞蛋, 一轉便轉開蛋殼, 原來內裡有一隻小鳥躲了起來. (巧打耳呀!! )

其實, 我今日才初初認識阿輝, 他就如老友一樣, 不停拿來珍藏給我拍照, 又情熱講解, 從輝雙眼看出, 玩具帶給他非常大的滿足感, 阿輝揚言, 可見將來都一定會繼續維持幸福, 未想過放棄. 

好!阿煇, 我暑假前再來找幸福, 再來與你吹水. 約定你下次在家中再多找出一些寶物來給我大看眼界喇!!