26/04 這個星期天本應是約了媽咪入西貢的 ,
但媽咪星期六又約了朋友剛好朋友 L WhatsApp 問星期天有咩節目 ,
所以星期天的食腳就換了朋友 L 陪我去西貢搵食喇 ! ^^
哩個紙船陣都幾靚喎 !
之前係明報 OL 網見到介紹這間 " 金山粥店 " 嘅腸粉話好食 ,
於是就諗住第一站就入去食早餐 , 但幾經辛苦先搵到間舖 ^^
聽講佢嘅蝦米腸同炸兩好受歡迎 ,
當日眼見好多食客都係叫粥再加呢兩樣腸粉 ,
本應我哋都諗住 order 哩兩款腸粉 ,
但朋友 L 見隔離位的炸兩勁大碟於是就問我食唔食得晒 ?
朋友 L 未入西貢前因胃部不適已經食了少少早餐 ,
所以她驚會食唔晒咁我唯有揀試炸兩先 ( 因為我鐘意食炸兩多啲 ^^ )
朋友 L 覺得雖然 ok 但未至於好食到要專登入去食 ,
但如果有朋友去開都可以推介一試嘅 !
而我自己就覺得好滿足好耐無食過咁正嘅炸兩 ,
這種感覺真是舊粥舖先會搵得到
" 皮蛋瘦肉粥 "
個粥我就覺得麻麻地可能我覺得佢淡味啩 !
如果再有機會要試清楚先得
食飽飽就繼續周圍逛我哋當天的活動範圍都是在碼頭附近 ,
但西貢碼頭原來假日是咁多人的 , 所以唯有沿岸照下啲船仔啦 ! ^3^
大家拍完一輪照就去咗 "全記海鮮菜館 " 飲茶 ,
之前都有同媽咪來過這裡飲過茶都算 ok 嘅 !
嘩 ! 好似好犀利加上我又鐘意食奶皇包緊係要一試啦 !
三隻飽就只有朋友哩隻奶皇包先有咁流心 ,
唉 ! 失望呀 ! 仲要話係金牌添點搞呀 ? >.<
" 全記蝦餃皇 "
朋友在酒樓外見到食客的蝦餃都幾靚仔 ,
於是就剔了一籠但點解無咁靚仔嘅 ? ( 唔通真係隔離飯香 ^^ )
" 鮮蝦燒賣皇 "
" 鮮竹牛肉球 "
飲完茶又差不多是回程的時間因朋友 L 要同屋企人食晚飯 ,
咁我哋就開始去買要買嘅嘢
當我話入西貢時朋友就即時諗起話要買 " 龜包 "
因她之前食過話好好食仲念念不忘添 !
原先朋友都唔記得間店名但最終又比佢搵到就係哩間 " 陳褔榮餅家 " 喇 !
朋友講嘅 " 龜包 " 原來即係 " 甜豬包 "
朋友先買咗一隻分咗一半比我試食 ,
咦 ! 真係好好食喎 ! 外皮微脆包心軟熟得嚟又有少少甜 ,
有越食越想食嘅感覺最終每人掃咗半打走 ^^
最後就係要嚟哩間 " Sai Kung Cafe & Bakery "
我最愛就是這裡的鮮奶撻 ,
可能臨近三點三有好多人在排隊當日仲要好曬添 !
之前我只食過佢嘅葡撻同鮮奶撻 ,
但當日閒逛時就見到有個男仔一手攞住好多隻麵包 ,
那時還未知邊間麵包店咁犀利 ,
到排隊時才知原來是這間店的菠蘿包 ,
大部份人排隊都是買菠蘿包同菠蘿油 ,
當時約下午三點人龍都排得幾長 ,
排隊時見麵包師傅不停咁出菠蘿包真係好似好搶手喎 !
" 鮮奶撻 "
我極力叫朋友 L 試鮮奶撻最終佢都試咗 ,
我排第一轉時只記得自己要幾多隻鮮奶撻而忘卻了朋友 L ,
就在這陰錯陽差的情況下朋友 L 反而食到剛出爐的鮮奶撻 ^^
當晚就與媽咪食包包同鮮奶撻做晚餐 ,
加埋維他出品嘅港式奶茶同鴛鴦感覺自己好似去咗茶檔一樣 ^^
