睇個標題相信你都唔知小弟講咩，成語七零八落，意思喺唔整齊、零散嘅意思，但今晚嚟到BBQ 7080，就絕對唔喺零零散散，唔上唔落，而喺食得滿心快樂，同麵包班同學仔夫婦一行三人，眼見BBQ 7080近排晌食評榜排得好熱，點都要嚟會一會。
一貫韓燒店嘅格局，所以，環境唔使多提，只喺內裡有好多牆畫，幾得意。又有個角落扮晒舊式韓國啲檔口，又喺影相位。
朋友特別鍾情韓國菜，因為，前菜既好食，花款多，又有特色。先嚟一人一份「前菜」，有醬油凍豆腐、洋蔥絲、後者淨食或夾埋生菜，烤肉食都得。
另外，仲有一齊共享嘅韓式泡菜、蘿蔔絲及豆角。泡菜辛辣爽脆，好好食，而最得小弟莫過於啲醋醃蘿蔔絲，淨食既能開胃，夾在肉中，可減油膩。
點菜重任交晌老友兩公婆身上，因為佢哋對韓燒甚有心得。雖然有兩款二人套餐（$548 / $788），包多款烤肉、煎餅、炒粉絲、蔬菜拼盤……等等，計落其實幾抵，不過，佢哋都喺喜歡散叫，可以點晒啲心水嘢。
經商議，烤什錦牛肉夠抵食，濟州黑毛豬又喺心癮想試，加份鰻魚及八爪魚串，烤肉就定好晒。由於一心一意嚟食韓燒，至於其他韓食，覺得未必需要晌度試，所以，試啱心水就夠喇！
![bowl]()
Dry Finish $30
老友好啤酒，就陪吓大家啤啤佢，前後點咗3支韓啤，揀較Dry嘅一款（Dry Finish, alc 5%），貪其易入口，飲落又真喺幾唔錯喎。至於韓國真露、馬格利酒、梅花酒……等等，一樣有供應，睇睇邊一款又啱你口味！
![bowl]()
烤什錦牛肉 $398（450g）
一份有齊牛脷（前）、牛肋骨肉（中）、特級雪花牛肉（左後）及LA牛排骨（右後），抵死原因除咗一次過試到幾款烤肉外，更可以試到唔同部份嘅口感。
食韓燒，多數會附送一兜生菜，用嚟夾埋啲肉一齊食，減低油膩之餘，亦令個味道清爽啲，晌BBQ 7080生菜可以任添。另外，亦供應海鹽蒜油、一小碟麵豉醬、蒜片及青辣椒為佐料，加咗可以令肉味更突出，味道變得更豐富。
幾款肉都各有特色， 牛肋骨肉夠肉味，口感軟腍， 特級雪花牛肉則比較腍滑，又有較多油香，至於LA牛排骨入口厚身挺實，富肉香，反而牛脷薄切，個人覺得無咁理想，太薄無咗牛脷份獨特嘅爽口感。
![bowl]()
濟州島黑毛豬五花腩 $168（180g）
一客裁出兩件半，睇樣肥瘦各佔一半左右，但望見一大截肥肉有啲人可能已經有啲怯場，但朋友就如獲至寶咁款，小弟對肥肉無歧視，只會喺少食為妙而已。
黑毛豬喺濟州島嘅名物，出名肉味濃。晌燒個過程，五花腩不斷滲出油脂，間中有少少搶火，但就搞到一室油香。將五花腩剪成細細件，小弟就最鍾意包生菜，加蒜片搭酸蘿蔔絲，滿口脂香，但出奇地無想像中咁油咁肥，而且，肉質有少少鬆化感。
![bowl]()
韓國烤鰻魚（韓國統營） $198（200g）
初時以為「韓國統營」喺晌韓國嘅乜乜乜官方機構，朋友話喺釜山附近嘅一個漁村城市「統營市」，晌韓國人眼中，有着「東方那不勒斯」嘅美譽，真喺失覺晒！一客有4大件鰻魚，並附上烤鰻魚用嘅醬汁，好抵食。
原來燒鰻魚真喺唔易，放入爐中，好快捲埋，又易黐底，好在朋友手勢好，燒鰻魚確有一手，如果自己無信心搞，就最好請店員幫手，燒肉燒魚佢哋個個都手到拿來。燒到半熟左右，剪成細件浸醬汁再燒多轉，啲鰻魚就嫩滑甘香，外皮有點焦脆，真喺好味。
![bowl]()
烤大八爪魚串 $68（4串）
初時都諗緊烤魷魚好，定八爪魚串好，最後揀個平平哋嘅八爪魚串，意外地咁好食喎。一客有4串，串串都插滿八爪魚，因為醃製過，所以色澤有點深。
燒好嘅八爪魚，一啖一粒，咬落煙煙韌韌，好有嚼頭，味道帶點甜甜哋，幾得意。再唧少少檸汁，更有一份清香鮮味。鍾意嘅話，可以好似我咁，一次過包幾樣嘢：牛肋骨肉、鰻魚、八爪魚，有軟有韌，好有趣味。
埋單之際，送上少少韓國香口膠及糖果，聊表心意。
雖然無叫啲飽肚飯麵煎餅墊底，但食吓食吓啲烤肉都好見飽！今次韓燒，覺得最滿意都喺兩位朋友，因為，讓佢哋重溫舊年去首爾食韓燒嘅滋味。
個人評分
味道：8/10
環境：8/10
服務：9/10
抵食：8/10
平均每人消費：HK$340
餐廳資料：
BBQ 7080
銅鑼灣登龍街28號永光中心2樓
3904 3693
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
8
BBQ 7080 - 七零八．樂
BBQ 7080 (銅鑼灣店)
首首.韓式小館
T.O.P.商場地庫
Kim's Spoon (九龍灣MegaBox店)
Cobo House
韓牛韓式燒烤
海魂燒
Angry Oppa Restaurant & Bar