探險家攻略 > 休閒玩樂 / 城中探秘 > 其他 / 特色景點 > [親子旅遊] 錦田錦田鄉村俱樂部

8 [親子旅遊] 錦田錦田鄉村俱樂部

由 kimfamilytravel 於 2015-01-19 00:00:00 發表 | 累積瀏覽 1829

分類：其他特色景點；地區：元朗

最近冇咩做功課，所以2015年頭一開始又嚟多次錦田鄉村俱樂部，

今次嚟到居然都有d驚喜，就係增設咗2個新場地，係動物電動車隔離多咗個電單車同埋碰碰車！

一入到場呀仔已經好想即刻玩啦，你知啦，雖然呢度唔駛入場費，但係其實玩每一樣機動遊戲好鬼貴，

就呢個碰碰車已經成$60一次，但係無辦法，嚟得點都要玩一次，

大家只要去動物電動車個度就有得賣飛，其實指示好唔清楚，好多人見到碰碰車個度有人排隊，就跟住排，排到頭先知要去買飛！

另外電單車同動物車都要3-40蚊一次，每次玩10分鐘，其實都幾貴，

但係都俾小朋友玩1次啦，所以總共呀仔用咗$90玩碰碰車同電單車，

呀妹就偷雞係附近坐上去坐吓就算，當玩咗！

因為每個人入場佢都會寫個入場時間係貼紙度，然後貼係小朋友身上，註場有個人會去望吓邊個玩得耐睇吓夠鐘未，所以其實都偷偷吓雞玩到10－20分鐘既，咁就覺得抵番d囉

之後我哋就去大草地度踢吓波吹吓bubble，俾佢哋放吓電！最緊要唔駛錢嘛

最後因為呀妹都玩過任何機動車，所以我都俾呀妹玩一次動物車啦，佢仲要話自己玩唔駛人陪，呢個妹兩歲就咁大膽！

呀妹就玩$30，今次我哋冇摘士多啤梨呀！所以總共消費咗$120就玩咗大半日啦！哈哈

Photo by CANON 5D Mark III, Len | EF 35mm f/1.4L USM

錦田錦田鄉村俱樂部 3.3.2015

呀劍評分: 8分

呀劍評語: 有動物, 有嘢玩, 有得跑, 有得食! 又易去, 實在係一個幾啱親子一家去既地方, 所以先會每年都去一次!

錦田鄉村俱樂部簡介

錦田鄉村俱樂部是一個集多項遊樂設施的超大型戶外場地。位於錦田水頭村的錦田鄉村俱樂部佔地100萬平方尺，設有一個全港最大、可容納2000多人的全天候天幕燒烤場。還有親親大自然的釣魚場、有機農莊、兔仔樂園，尤其適合親子樂；若要動感一點，錦田鄉村俱樂部亦War Game場，射箭場及康體活動場地等。附近的「有機士多啤梨自摘園」更是不能錯過。錦田鄉村俱樂部有玩不完的設施；超廣闊的大草地，除了可欣賞一望無際的怡人景色外，最適合放風箏及進行各項親子活動，亦可以攜帶寵物入場。「有機士多啤梨自摘園」是免費入場的，只是摘來的士多啤梨會以重量收費，遊人要將摘下來的士多啤梨到收銀處付錢後，才可以即場品嚐。

地址

新界錦田水頭村 684 地段109