本來我哋去完教會之後1點幾個天都陰陰地, 所以我都係博一博,
因為如果去到落咗車就唔駛指意有車出番嚟...
跟住叫Hysan祈禱, 俾佢知道神係好聽小朋友祈禱, 我冇諗過如果最後落雨點同佢解釋架!
其實都已經有好幾年冇去過，個陣時帶老婆(仲係女朋友既時侯)
今次再去都唔係好記得條路點行，我剩係記得係南生圍路個入口行去草地個度要成2粒鐘，
所以今次我同全家先搭的士，但係去到半路落車，因為我想同佢地望下紅樹林濕地，睇吓白鷺同唔同種類既雀仔，
我哋選擇咗喺山貝河同埋錦田河交叉位的那段南生圍路落車，
我呢度落車沿路行都要行半個鐘頭先到大草地位置
中途行過對面馬路見到有個湖行去睇，見到有棵樹跌咗落水
呢棵樹好勢利！一棵生好多支樹枝出嚟
不過未到大草地之前我哋中途去咗個茶座坐坐，望吓風景同湖景！
食左碗餐蛋麵，你知一場嚟到見到佢有咩都叫嚟試吓，
其實只不過係砵仔榚同埋茶粿，講真唔好食，但係配合埋個環境咪當POPS影相囉^.^
不過碗餐蛋麵真係好食，係一丁麵同埋塊餐肉係煎到好脆個隻！
Photo by iPhone 5S
食完之後我哋係附近周圍睇吓影吓相,
呢度都種咗d唔同既水果仲有架好大既鏟泥車,
大家去開旅行影相個陣通常都係叫小朋友望鏡頭,叫極佢都唔肯望攪到大家都好唔開心,
有陣時隔硬迫佢望而佢又唔合作,就攪到本來開心都攪到個小朋友喊哂,
其實影相唔一定要望鏡頭,有陣時叫佢因應著個環境叫佢做出唔同既鬼臉或者動作,其實仲特別!
你睇吓佢同大鏟泥車合照, 來一個跳躍, 影同被影都非常開心!
我跳!!!!!
之後我哋行吓行吓終於去到南生圍個大草地, 真係相隔好多年冇嚟啦, 完全對呢度冇咩印象,
呢個草地就好似一張彈床咁, 佢哋兩個一到就瞓落個地度, 碌嚟碌去!
嚟到先記得呢度可以放風箏!下次一定要帶嚟玩
隻狗一路追住Hysan,嚇死佢
Shutter Speed | 1/400 s
Aperture | f/2.5
ISO/Film | 100
佢哋用乾草做帽放上個頭度, 好攪笑!
再繼續向前行,去到大樹林,我哋停咗係一棵瞓低咗既白色樹幹度玩,
佢哋玩玩吓變咗係度「捉依因」妹妹搵唔到哥哥係邊, 一路問「哥哥呢?!」
Shutter Speed | 1/200 s
Aperture | f/3.2
ISO/Film | 200
跟住個度仲有2個用乾草搭成既小屋仔,Hysan同芊芊都自己揀咗一個做佢地既屋企,
Hysan係裡面用樹葉煮飯仔, 芊芊都跟哥哥一樣喺度煮飯仔!
然後媽咪執起其他樹枝同佢哋起一個大既草屋!好好玩,行過既途人個個都嚟我哋個屋仔影相,好似變咗個景點咁!
在向前行少少就到咗最出名既木橋, 個個結婚拍戲都會係度影相,
我本來就冇咩興趣, 不過全家嚟到都要影番張先得既! 到此一遊嘛!
Shutter Speed | 1/100 s
Aperture | f/1.8
ISO/Film | 600
當你行行吓會見到對出有一個爛屋,你要留心D先搵到有一條路係行入去個度,
因為條路係俾D好高好高既草圍住,如果你有小朋友一定要俾佢哋入去玩吓,
因為佢地好興奮,D草仲高過大人,佢咪覺得好似個迷宮咁,
行到半路有2條分岔路,有BB車要行右邊好D!
入到去就冇咩特別,都係同佢哋望吓間舊屋,上二樓望吓風景,睇到稻田!
最後都差唔多5:30係時侯走啦,我哋仲要行多15分鐘度跟住見到一間士多,
橫渡頭就係前面,$6一個人,只係搭去對面岸,其實大家如果唔駛諗住睇紅樹林同埋睇吓雀仔,其實可以就咁係呢邊入南生圍都得!
等緊艇仔個陣睇吓個泥灘有好多彈塗魚,Hysan話仲多過濕地公園呀!
最後大約行5分鐘就會見到有小巴可以去番元朗合益街巿.
如果唔想搭可以行番出去新元朗中心,即元朗西鐵站,大約20分鐘!
沿途會見到鐘聲學校,好易行,唔駛驚盪失路!
Photo by CANON 5D Mark III, Len | EF 35mm f/1.4L USM
呀劍評分: 10分
呀劍評語: 如果講大自然真係滿分, 睇住佢哋瞓係草地同玩樹枝搭屋仔, 真係RAW! 如果你要去行個D自然教育徑, 行硬地都係比較難行, 不如去呢度行淋地仲舒服!
呀劍貼士: 廁所就只有一個個的流動廁所, 如果去大就真係麻煩D同臭D, BB換片就只可以行埋一邊, 冇計啦, 想親近大自然, 去便便就係冇咁方便架啦!
南生圍簡介
一個字RAW得嚟易去! 有雀有草地有樹林有長草有破屋有艇仔有士多茶座...講完!
建議落車起點
錦田河與山貝河的交匯處
1.乘76K巴士在紅毛橋下車(南生圍路口,步行草地至少2小時)；經橫水渡於新元朗中心回程。
2.(建議)乘的士至錦田河與山貝河的交匯處,沿途觀賞沼澤及雀鳥又可到茶座食個lunch或tea,才到草地樹林遊玩;經橫水渡於新元朗中心回程。
3.步行起點:元朗港鐵站,另要坐舢舨過河需時：25 分鐘
(以上資料更新至文章當日)
10
[親子旅遊] 元朗 南生圍
南生圍
釜山水族館
Thormork 冰島高地
六義園(東京)
中環街市
珠璣巷
數碼廣場
G-fit