半年前,同屋企人黎過食lunch buffet,食物款式夠多元化又好味,價錢合理,飲品仲任斟任飲添,抵食。
適逢朋友生日,故提議黎試dinner buffet。點知,一巡視完個場,超級後悔﹗﹗d食物款式及種類同lunch差唔多,同樣有85折優惠,但價錢就貴左一大截。
刺身係佢地的強項,分別試左北寄貝和三文魚,北寄貝夠鮮甜;三文魚夠肥美、入口即溶。冷盤的翡翠螺較細隻,肉質尚算爽口;長腳蟹較細隻及較水,肉質一般,唔夠肥美,一剪開就水花四濺,鬼咁狼狽,好彩waiter好細心咁比多張餐巾我;而巴馬火腿配蜜瓜雖則夠鹹香,但咬唔爛,只好棄掉。
天婦羅有六種,小妹試左的紫菜及冬菇頗正,既保留原材料口感及鮮味,又香脆可口而不油膩。相反,蟹柳、炸蝦味道欠奉,後者食完仲滿口油。沙律吧材料夠多夠新鮮,可隨意拼湊自己的favourite,小妹加左心愛的煙三文魚,超級無敵yummy﹗雜肉凍批就頗難吃,泰式炸物(碎蝦混合咖哩及麵粉的物體),同樣難以下嚥。
炸蝦層皮似麥樂雞d皮,怪怪地,炸漿多過蝦肉,失敗之作。蝦丸唔夠彈牙,又唔夠鮮,唔入味。燒大蝦夠大夠鮮,可以一試。
甜品櫃令人目不暇給,選擇繁多,係小妹至愛﹗酥皮鬆脆、甜酸混為一體的芒果拿破崙和幼滑清香的香橙天使脆脆蛋糕也值得推介。Macaron分別試左紅桑子及開心果味,尚算合格,但唔夠鬆軟。不得不試的HaagenDazs雪糕櫃又豈能錯過,小妹略嫌流心朱古力太甜太漏,想食草莓味又被人搶晒,故最終揀左雜莓味。(扁嘴) 焦糖布丁、和菓子、芒果布丁、牛角酥等,則屬一般之佳。
當晚窗簾全部拉下,完全睇唔到外面的風景及燈光。從縫隙中,可見職員正忙於拆卸帳篷。再加上天花板較高關係,燈光照明不足,昏昏暗暗,令人有昏昏欲睡之感。
============================================
感謝 蒙奇奇 提供以上資料
蒙奇奇的網誌: http://www.openrice.com/zh/gourmet/reviews.htm?userid=538821&city=hongkong
============================================