探險家攻略 > 龍鳳冰室 ‧ 中伏中伏!!!! 「熟透霉爛花生湯丸，貴價搵笨芝士薯條」

龍鳳冰室 ‧ 中伏中伏!!!! 「熟透霉爛花生湯丸，貴價搵笨芝士薯條」

由糖小妹於 2013-04-08 00:00:00 發表 | 累積瀏覽 1021

分類：

前幾天復活節假，原相約了同事到美食雲集的大坑覓食，當中藝人開設的龍鳳冰室也是我心中名單之一﹗不幸地當天同事病了未能繼續這覓食之旅，心想應該有排都試唔到佢喇﹗ 這天出席完素食餐廳的試食活動後，身為肉食愛好者的小妹有感胃部空虛，便決定再到灣仔找食店充實一下（俗稱*溝貨)﹗走著走著，發現了龍鳳冰室﹗原來最近在灣仔也開了分店，真巧合，亦感謝食友們陪我繼續食﹗

龍鳳餐廳的門面很有氣勢似的，牆壁用上顏色格仔磚，帶著點點懷舊的味道。貼上藝人老闆林子善的雜誌訪問報導和食物相片。金色文字的招牌設計亦十分亮眼，內裡坐位不多，牆上貼了很多藝人的相片及大片藝人簽名板，驟眼睇好像挺厲害嘛。

而食物呢？看著餐廳感覺滿多元化，糖水特飲熟食一應俱全。最印象深刻的是「米佐治」推介及一些改了特別名字的飲品，像遊龍戲鳳（菠蘿+益力多+沙冰）和黃金戰士（椰汁+橙汁+菠蘿汁）等，兒童鴛鴦（柯華田+好立克）亦滿有趣。這麼多元化，係咪真係樣樣做得好呢？心想這店子還滿有名氣，所以還是抱著一絲期望﹗最後我這湯丸癡點了一客龍鳳湯丸（芝麻＋花生湯丸）、芝士薯條和芝士西多士。

落單後，店員告知只餘下花生湯丸，所以諗住轉士多啤梨益力多沙冰﹗點知店員又話士多啤梨未返貨﹗唉，所以最終都係要返花生湯丸 $22，原來這就是惡夢的開始﹗湯丸上桌時共有6粒，而且賣相仲要比外間大粒﹗湯底用上蕃薯糖水，薑味不重。食粒後終於知道點解咁大粒了﹗湯丸已經煮到過熟導致發漲晒，在口中霉霉爛爛的質感認真難頂..咁都未算最衰，咬落仲要冇流沙﹗.....「利川湯丸」都有流沙啦﹗$22蚊碗仲要咁既質素？真係完全無胃口再食佢，咁普通既湯丸都煮到咁，太失望喇﹗

芝士薯條 $55
比這裡的普通薯條貴近一倍，對於愛吃的小妹，如好味當然不是問題﹗端上桌時已覺得面頭的芝士好少﹗用上粗薯條，熱辣辣固之然好味....但芝士真係得面個浸..應該是用上巴馬臣芝士，雖然可拉到像pizza般長長的芝士，但芝味實在薄弱得緊要..像在吃普通薯條，感覺很搵笨..又一失望之選﹗(有感KFx的車打芝士薯格還比它好..！）建議轉用車打芝士會更加惹味﹗

芝士西多士 $22
以港式西多士中間夾著一塊芝士，這已算是當中比較好味的，賣相亦不錯，但卻不是特別好味！食落雖則仍隱約食到芝士味，但大部份都被雞蛋和牛油味蓋過了。如只是一個普通西多卻合格有餘，但對於芝士迷相對較失望。

整體味道比預期差太多了﹗連湯丸都煮不好，還是我不幸點了這幾款水準麻麻的食物？而且由坐下至埋單一杯茶／水都冇比過我地，要我地問先比！仲要係超級熱既熱水，咁熱叫人點飲呢？真係有點覺得貼錢買難受！很多時再開分店食物水準普遍都下降，希望藝人老闆能正視食物水準問題.....

龍鳳冰室 Lung Fung Cafe
地址 : 灣仔春園街16號地舖
電話 : 2618 8088

============================================

感謝糖小妹提供以上資料

糖小妹的網誌: http://concon2016.blogspot.hk/

============================================

鐘意SeeWide的分享，給我們一個Like吧！