HIM生日局@ 隆濤院 + 再訪川善 (Yahoo copy版)

第一站去了1881的隆濤院, 依間野都係我的wish list中好耐, 不過是次到訪經歷麻麻呢~~



先講環境, 其實佢係好富有中式風情, 又有好多懷舊配飾, 感覺幾型格的, 不過房間隔間較細, 檯與檯之間擺得亦較密, 坐得其實唔算好舒服.... 好在侍者已經送上一個cusion, 服務加返分啦!



其次就係佢的用餐時間頗為騎呢, 午餐分為11:00-12:45, 以及13:30-15:00, 唔係太早就係太遲, 好古怪呢.... 大家既要顧慮下場, 又唔想太早起身出黎, 真係好難抉擇!! 
 


最終大家都係揀後一個時段, 而抵達後另一個問題就係散點, 定係任食好? 話哂都係酒店中菜廳, 一籠蝦餃已經$58啦, 雖然大家一早知道唔會食得多, 都決定要$230包茶芥的任食plan~~



以水準唔錯的前菜開胃後, 就開始任食任點時間! 食物選擇講多唔多, 話少又唔算太少, 比較特別係有埋媽媽愛心湯可揀, 當日也來了兩份, 其中一份落哂我肚, 味道正常~~~



選擇仲包括埋是日涼茶 ($15), 又要了兩碗, 我都分享了1/3碗, 當日係夏枯草, 頗甜~~



Ivan同Min姐都好多野唔食, 其中叉燒算係最冇問題的一項, 所以所有叉燒點心都有點~~ 依個蜜汁叉燒酥 (散叫價$48) 酥皮做得OK的, 不過食落原來冇乜叉燒呢..... 


大家最期待的是香檳蝦餃 (散叫價$58), 淺粉紅色賣相真係好靚丫, 但食落我唔覺得特別出色~~ 但由於其實好味選擇不多, 後來都encore左兩輪架, 但最後個輪已經變哂樣了.... 



其實點心中我覺得最好食係金絲燒鵝酥 ($48), 我獨個食左一隻; 其實佢好食唔係在於燒鵝, 而係中間軟滑可口的芋蓉 , 不過始終係炸點不直多吃, 所以後來都決定唔好再追加了~~~ 


豉汁鮮蝦燒賣 (散叫價$48) 燒賣非我所好, 雖然賣相非常靚仔唔錯, 但聽大家食後感話蝦係無味的, 咁我都係唔食了..... 



之後3款炸點併埋一齊上檯, 首先三文魚春卷 (前, 散叫價$48) 我覺得唔錯, 皮薄香脆兼香口; 皮蛋蝦筒 (後, 散叫價$48) 的皮蛋味唔夠突出, 一般啦; 最後竹笙上素腐皮卷 ($42) 都可以~~
  

依個炸两腸粉 (散叫價$48) 都唔錯, 因為可以點多款唔同的醬汁同食, 滋味特別豐富!
 


蜜汁叉燒腸粉 (散叫價$48) 皮算薄, 味道就無特別, 冇法啦, IM又唔食瑤柱豬膶腸粉~~ (雖然豬膶好似對孕媽媽都唔係好適合??? 唔記得了....)



為了叉燒又點了蜜汁叉燒包, 又係唔多叉燒餡, 肥肉就多.......



Min姐係伊麵粉絲, 特別點了一碗干燒伊麵, 成品味道OK, 撈辣醬幾惹味添, 但炒得好碎濕濕囉~~ 我就另外點了一份菜甫肉粒炒飯俾自己, 但整整下原來忘記影相添! 算啦, 都係一般~~


H (即CEO!!) 點的雞茸粟米羹, 冇試亦冇問, 唔知水準如何呢???



想食健康D, 在媽媽的要求下, 前後來了兩碟清炒時蔬 (散叫價$58), 菜芯幾嫩喎, 只嫌油了些少 (後來睇返原來可點上湯時蔬, 豬左啦....), 所以我大量進食!!!


其實我地點得真係唔好多, 到底食唔食得返個價真係有疑問架... 不過正常人士試埋其他我地冇點的: 原味蘿蔔糕、香煎蓮藕餅、生煎菜肉包、陳皮山竹牛肉球、鮑角滑雞札、豬膶燒賣 (依個$68架!)、沙嗲金錢肚、豉汁蒸排骨、鮮菇棉花雞、豉汁蒸鳳爪、瑤柱豬膶腸粉、豉油皇煎蝦米腸等, 應該就可以回本的~~
始終HIM係甜魔組合, 甜品環節會試多D, 首先係芝麻卷 (散叫價$38) 同蛋散 (散叫價$38) -- 前者在食評中的評價好高, 但當日的出品非常糊口, 超唔得! 後者亦唔夠香脆, 但同上的蜜糖就好味
 
蒸奶皇包 (散叫價$42) 既無流心 (其實都唔緊要), 仲要奶皇餡得好少 (依個我介意!), 唯有食剩D包算數~~



又點了香滑豆腐花及陳皮紅豆沙各二 (散叫價$38@), 紅豆沙比較淡, 豆腐花就好唔錯, 真係幾香又好滑口, 除了加黃糖, 媽媽落埋蛋散的蜜糖同吃, 更加美味! 所以最後encore多盅!!
 

最後仲有酥炸馬蹄條 (散叫價$38) 同炸蓮香煎堆球, 前者我冇試, 但CEO同文迪食那件竟然係炸唔透的.... 好差! 後者都唔夠香脆鬆化, 中間的蓮蓉亦唔覺特別香滑, 都係一般咋~~

 
餐廳不設任何信用卡優惠, 今餐5個人埋單$1,265, 抵食度同早前的阿一海景飯店lunch相差好遠呀~~

上場麻麻地, 好在下場非常精彩 ---- 我地重訪了上環人氣小店川善茶居呀~~~ 
 

CEO又飲Matcha Caipirinha ($42) 啦... encore左咁多次, 相信應該真係唔錯, 下次再訪的話我都會想試試~~~



文迪揀了Matcha Snow White ($42), 成品好靚但印象中味道較淡的, 所以不是我杯茶



hehe, 今次我點了Green Hot Chocolate ($32), 是由優質綠茶粉+白朱古力牛奶及忌廉打成, 甘濃清幽得來富有朱古力的香甜, 好好飲, 我好鍾意丫~~ 



Min姐同Ivan不約而同揀了Mango Tango ($38), 據講都好清新好飲架~~ 



來到甜品環節真係大滿足, 因為一次過品嚐了好多款新出品, 先係Angel Cake ($38), 鬆軟又甘濃濕澤的綠茶蛋糕, 加上清新可人、輕柔不膩的綠茶忌廉, 好好味呀~~ 



難怪早前Ivan同Min到訪時, 可以3個人KO成個蛋糕啦~~~ 真係不知不覺就清光的! 


Green Tea Cheesecake ($40) 又係好正, 芝士餅本身質感一流, 餅底又夠厚, 而且綠茶的清幽中和了芝士的膩滯, 加上面層輕柔的蛋白泡沫滋味更豐富, 媽媽忍不住食了好多丫~~~ 



仲有Sinmei最新研製, 尚未推出市場的Green Tea Ponna Cotta (未定價), 成品非常香滑, 同時又有甘濃綠茶味, 再襯以鮮甜嬌艷的清甜士多啤梨, 唔駛諗一推出一定又會熱賣!!



來到川善茶居, 點可以唔食最最馳名的綠茶心太軟呢?? 不過sorry, 當日真係冇綠茶心太軟食, 因為我地食的係更加美味的焙茶心太軟!!!  



依個巨大的心太軟, 就變成七月壽星H & M的生日蛋糕啦~~ 生日快樂!! 
 


雖然啡綠色的熔漿唔夠綠色流心悅目, 不過味道更為甘濃美妙, 無論淨食或是襯以雪糕, 都實在係好味到難以形容; 結果大大個心太軟, 唔駛10分鐘就徹底KO清光哂啦~~~ 


當日仲試了天才餅廚Matthew在川善寄賣的Chocolate Citrus Dome cake ($65), 成品由鏡面朱古力外層、70%朱古力慕絲、香橙忌廉、柚子醬、咸味焦糖及朱古力脆餅所組成, 層次與味道非常豐富繽紛, 令人留下深刻印象, 相信他將來一定會大展拳腳!!  


最後仲嘆埋Ivan在歐洲買回來的花茶, 其中後面個款蘋果茶超級好飲呢~~~ 



仲有巴黎Aoki買來的綠茶醬, 伴上清甜的士多啤梨同吃, 非常美妙~~~~ 

============================================

感謝 甜魔媽媽 提供以上資料

甜魔媽媽的網誌: http://gourmetyan.blogspot.hk/

============================================