5 AUGUST 2015(WED)
今日小小豬又約埋魚子醬及SY哥哥去玩,齊齊去玩轉Sanrio Game Master優先玩呀~整個Sanrio Game Master以七個遊戲及三個大影相區為主,玩贏遊戲可以獲得徽章,集齊徽章換終極扭蛋呀!
入場第一個遊戲就係以Patty & Jimmy為主角嘅碌保齡球~
遊戲其實好簡單,係20秒內用4個保齡球推倒3個保齡樽。看似好容易,但其實保齡樽個企位都有點實,要有用啲力度可以用保齡球推到。相信依個遊戲係三個小朋友至愛,因為佢地來來回回玩左十幾次呀~
15秒內要用電捧行迷宮,其實依個考眼力同定力嘅遊戲小小豬都真係唔多識玩,佢都係志在攪攪陣一番~
利用20秒時間將粒鐵珠由起點推到去終點就勝出,依個遊戲係小小豬另一至愛,同SY哥哥來來回回又玩左唔知幾多十次呀...哈哈哈~
利用10秒時間不停拍拍拍,其實係控制個風筒幫XO 吹番返個靚頭。小小豬都應該都唔多識玩,不過三位小朋友不停拍拍拍,仲三個人拍一部機,場面又真係幾搞笑呀~
20秒內係啲粒粒堆中,搵返啲Melody圖案積木,砌返個Melody樣就成功。其實依個GAME都幾好玩,不過由於張枱對小朋友嚟講又真係高左啲,又冇提供腳踏,所以抱住小小豬嚟玩...我又真係辛苦左啲啲,所以只係玩左幾次呀~
嚟到今年新加入Sanrio嘅蛋黃哥啦,未玩GAME前影下相先,懶洋洋嘅樣,真係好可愛呀~
20秒內需要將蛋黃哥成功拋反轉,咁就贏啦。其實個鑊都真係幾重,小小豬拎住都好吃力,佢又點可以拋反轉呀,所以都係志在攪攪陣啦~
當然依個只係裝飾,不過旁邊都有好多真嘅扭蛋機,可以扭出KITTY唔同精品呀~
臨離開前,當然要睇下今年有咩限定商品,種類都好多,樣樣都勁靚,好想買晒返屋企呀!其實我最想買嘅都係大富翁,不過..由於今日係優先場,為公平起見依個限量1000盒嘅大富翁要活動正式時先可以開始購買,所以同佢擦身而過了~
開開心心又玩左一個下午,唔覺唔覺我地係入面都玩左差唔多三個鐘,如果唔係因為關門,我想小朋友都一定唔願走呀!
More Information :
日期:8月6日至8月23日
時間:11am – 8pm
地點:九龍灣國際展貿中心地下
網站: http://www.sanriogamemaster.com