朋友曾經介紹過依間The Pudding Nouveau，
食物有水準得黎又食到最愛既甜品，
所以心思思一直想去食，不過因為前排朋友都唔得閒，
最後同左chicken一齊去見識，兩個人又去增肥了xd

黎到大坑之後先發覺，原來依到都幾多特色餐廳，當然依間係其中一間
歐陸式既風格，但內裡環境唔算大，但又未算好迫

食物款式幾多，有鹹食亦有甜食，專程黎到當然要留肚食埋甜品

茉莉花茶，以茶包形式泡製，好有茉莉花香，但飲落冇咩味，不過等多等啲味就出晒黎～
清新又帶香，如果味道覺得濃得制仲可以叫店員加水再飲，味道一啲都唔覺淡

經典英式早餐，裡面有幾種唔同既食物，賣相吸引又豐富，整睇黎講唔錯，有種如果日日早餐都係咁就好既感覺haha
食物中有2件法式鬆軟多士，食落去完全係用享受2字黎形容，咬落去唔單止香脆，內裡亦好鬆軟，毫不費牙力就落到喉嚨，加上無咩油味，可以話係超水準! 多士黎講值得一食再食～
薯餅，比較值得講既就係好重薯味，唔似快餐店既油味薯餅，味道可口
沙律，份量較小，但值得讚賞既係佢個醬汁，酸酸甜甜好開胃，裡面啲菜新鮮爽口，唔錯～

德國腸，皮脆內軟，但可惜既係比較油膩
芝士炒蛋，食落去唔會見到有芝士，亦都食唔出芝士既口感，但蛋入面的確有濃濃既芝士味，有趣得黎又好食既配搭！

煙肉，呢2塊煙肉食既時侯比較硬身，口感有啲難咬，但味道冇咩大問題
整體而言，食呢份All Day Breakfast有飽足感之餘，份量亦控制得好好，而且味道有水準！值得一試～

法式油浸鴨腿配窩夫，係甜食同鹹食之間，太陽蛋係烤鴨上面，可以令蛋汁滲入去再食，
鴨腿外層炸得通透香脆，食落會幾油，不過味道的確一流，鴨肉滲過蛋汁後，食落軟口
而窩夫則點果醬食，外層好硬，而且整體相對上太甜～

鴨腿一啲都唔覺咸，但食落比較油膩，果層皮太邪惡喇！油得黎但好好食！

炸薯條配黑松露醬，松露醬份量較小，味道亦偏咸，而薯條炸得幾香脆，份量好夠多

抹茶雪糕奶昔，奶昔上面有一球抹茶味雪糕，係一次味覺上既抹茶味體驗
雪糕同奶昔味道如出一徹，可以話有七分相似，靜低三分就係佢地既口感，
苦澀味同甜味約為1:5既奶昔，由於唔會甜到漏，所以飲落去感覺清新自然，值得推介！

雜莓煙燻奶凍，雜莓雪糕係自家製，莓味濃得黎幾甜，原本覺得飽飽地，一食之下立即又想再食XD
佢地自家製雪糕好正～奶凍好細滑，不過奶味濃啲會更加好～

============================================

感謝 chickenandpp 提供以上資料

chickenandpp的網誌: http://www.openrice.com/zh/gourmet/reviews.htm?userid=51033932&city=hongkong

============================================