大自然課堂之親親海星

18 AUGUST 2015(TUE)

今日我地相約魚子醬及Little K一齊係一個勁舒服又乾淨嘅石灘玩水，三位小朋友仲近距離接觸海星，上左一堂好好嘅大自然課呀~

其實自上年我睇到魚子醬媽一篇有關海星文章之後，我都真係超級好想去依個地方，目的當然唔係俾佢「玩海星」，只係想帶小小豬親身去睇下啲海星，等佢可以摸下海星嘅身體，依種大自然體驗總比書本上來的更加實在同入腦嘛！

不過，原來唔係話睇就睇，因為都有特定月份同日子，見到海星嘅機會先會更大。好在魚子醬媽經驗豐富，所以揀好日子之後就約我地一齊去上大自然堂。

老實講，依個地方都唔算近，所以我地都要搭差唔多一個半鐘車程先去到目的地。不過小朋友們搭咁耐車一啲都唔覺攰，因為佢地好期待可以親親海星朋友嘛！

終於嚟到我地嘅目的地，雖然整個石灘冇任何設施，不過環境真係好正，既乾淨又舒服，真係比外面有救生員嘅沙灘好好多呀~

小朋友們好努力咁找尋海星呀~

搵到啦...睇下小小豬幾興奮~

小小豬都算幾溫柔，每次都係好輕輕手咁摸下啲海星，仲依照我地指示，數十秒之後就要輕輕將海星放回水中啦~

由於三位小朋友中小小豬係最大個，佢又有機會扮大哥哥，佢將兩粒海星放入佢個小水桶內，然後扮老師咁叫魚子醬及Little K聽佢介紹，真係俾佢笑C呀~

觀察左海星一段時間之後，三位小朋友變左玩水時間啦，其實當時水位都係去到小朋友膝頭位置左右，所以俾佢地半游半爬咁玩水都係好安全嘅。

可能有其他小朋友一齊玩，所以小小豬玩得出奇地興奮，比平日我地帶佢去玩沙灘玩時，笑得更加燦爛~

小朋友世界就係如此簡單，兩個小桶倒下水又倒下啲沙，就夠佢地開心大玩特玩啦~

唔覺唔覺我地都玩左差唔多一個半鐘，太陽開始下山了，所以我地都準備要回程啦~

今次依個海星之旅都真係好滿足，小朋友玩得開心之餘，又學識點樣對待海星。回程時小小豬仲不停同我講：海星..海星..個形狀係點.....一定要輕輕力....仲要只可以睇十秒....一定要溫柔放返落水...如果唔係佢地就會死呀！

聽到小小豬咁多道理，雖然係有啲啲長氣(基本上回程時佢係不停講)，不過亦都證明佢對今次睇海星都吸收不少知識，所以我都值得開心嘅。

期待明年我地再齊齊去上大自然課，再同海星嚟個親密接觸啦！

在此就同大家說聲抱歉，因為地方係由朋友帶路，加上為左保育啲小海星，所以在此不說明地點了。不過我相信如果大家係想與小朋友到戶外上自然教育課的話，你自然就會找到依個上課地點。