7 Castello 4：亡羊堡牢

由山區麵包王於 2015-08-17 00:00:00 發表 | 累積瀏覽 920

分類：

歐洲嘅菜系中，小弟一向較為偏愛意大利菜，可能細個首先就喺認識啲意粉，薄餅之類，當然，再大個啲，賺到錢就可以試唔同嘅嘢，對意菜就唔再單喺意粉，薄餅啦。從雜誌認識到賣意大利菜嘅Castello 4，晌意大利菜式上又融和少少其他地方特色，今晚就走進依個「城堡」，領略一下固中滋味！

餐廳佔商廈4樓全層，一打開升降機門就喺餐廳。整體裝修甚具工廠風，銅色金屬質感配粗獷水泥地，夠酷得嚟，因為配合柔和燈光，又唔會被人覺得太冷感。

餐廳外，面向霎東街一邊，對正時代廣場背面，有個修長嘅露台，不過，狹長嘅外形，又位處低層，所以，景觀無乜，大抵喺俾啲煙民出嚟抽番兩口而已。

餐廳未有供應晚餐，所以，所有菜式就印晌晒3張（4頁）銅金色嘅餐單紙，貫徹全店嘅色調。

Nicoise Salad $84

個沙律睇似簡簡單單，其實配料非常豐富，主打嘅沙律菜以外，仲有炙燒吞拿魚、黑橄欖、法邊豆、薯仔、意大利蕃茄乾、水牛芝士，再加啲蛋絲做裝飾。以香草及油醋提味，令個沙律入口清新，材料亦食得到其新鮮感，尤其啲吞拿魚，紅潤鮮美。

Soft Shelled Crab Fritter $134

比起平時食手卷嘅軟殼蟹，依道前菜嘅軟殼蟹就相對好大隻，輕輕以天婦羅做法炸過，入口多份香脆，卻唔油膩，此外，又幾有蟹味喎！橙色醬喺啲紅椒、黃椒打爛做成，幾重燈籠椒嘅味，而綠色嘅喺牛油果醬，軟滑清香，兩款醬嘅令個軟殼蟹味道豐富咗，令個賣相又鮮明啲。

Stone Bowl Risotto $184

以韓式石窩盛載意大利飯，再分別配上唔同嘅材料，以石板整體奉上，感覺喺別樹一幟。而食法喺將芝士、牛油、三色椒及龍蝦汁倒入飯內撈勻即可，其實，啲飯本身已有少少龍蝦味，依家倒埋個汁（多少隨個人心水，但建議先倒一半，想濃啲就又再加），龍蝦味就更濃郁；而兩款芝士，車打及巴馬臣，加上少許牛油，令味道層次更豐富，所以，配合埋飯粒煙韌咬口，淨食個飯都好一流。隻虎蝦亦香口彈牙，值得一提蝦背已經鎅開咗，更加方便食用；只喺略嫌雞肉拉低個檔次，雖然喺話用咗春雞，但感覺唔出，倒不如改為海鮮，如魷魚或帶子，高檔啲，又夾個飯多啲。此外，用三色椒有份菜青味，影響個龍蝦汁底，唔知改用BB露筍切粒效果會唔會仲好啲呢？

12oz US Sirloin Steak $354

雖然餐牌只列明肉眼一款牛扒，但原來餐廳不時會有其他部位供應，就好似我哋原先打算食肉眼，但經理話嚟咗啲西冷好唔錯，所以，改咗一試西冷，同樣定價。相對之前幾道菜，個美國西冷扒嘅賣相比較寡，不過，啲配菜好好食，迷你甘筍、意大利黃瓜、蕃茄乾、連皮薯仔幾樣都好味，不過，件扒雖然都睇得出五分熟，但無論落刀、入口，都有啲韌，未符合預期，感到有啲可惜，唯一肉味濃。

服務方面，其實都唔錯，食完前菜後會主動幫我哋換碟，每道主菜亦同樣換上新碟及刀叉，又不時為我哋添水。不過，餐前無附送麵包籃或橄欖之類小食，有啲失分。而暫時又未有甜品提供，會令部分客人失望，尤其女生們；此外，餐後本想嘆杯意式咖啡，可惜，亦只有午市先有提供，所以，服務一欄就扣唔少分。唔知喺咪新開關係，覺得仲有啲地方要完善吓，正所謂亡羊補牢，未為晚也！

個人評分

味道：6/10
環境：8/10
服務：7/10
抵食：6/10
平均每人消費：HK$415

餐廳資料：
Castello 4
銅鑼灣霎東街15號Oliv4樓
2944 2299

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================

鐘意SeeWide的分享，給我們一個Like吧！