1月24日(星期六)~唔覺唔覺..同媽咪係海濱長廊行左2個幾鐘
下午再去商場行陣..返屋企休息下先~因為book左6點食飯
老闆依日有野攪..要晏d先到娘家~家姐姐夫就直接去菜館
之前問過媽咪想食咩..佢話想食中菜~所以同家姐夾好晒
依晚揀左去"Holiday Inn Express - 金滿庭京川滬菜館"
~ ~ ~ ~ ~ ~ ~ ~ ~ ~
食店環境好舒服~坐位空間感好ok~光猛整潔..園景景色怡人
菜館有5款特級名茶選擇(雲南舊普洱,人參烏龍,碧螺春,西湖龍井,鐵觀音)
揀左2款"人參烏龍 & 鐵觀音"~茶水巾芥($11/位)..餐前小吃($15/碟)
先點個"小籠包"($58/8隻)~無影相..小籠包皮薄多汁~肉質鬆軟
"川式酸菜魚"($150)~湯底好奶白..味道夠酸帶微辣
魚肉都幾多+鮮嫩~配料有泡椒,青辣椒,唐芹,酸菜,粉絲,菇絲,筍片等
依款紅泡椒..味道唔辣~反而帶鹹酸味道~整體味道好醒胃
![]()
"樟茶鴨跟鴨子"(半隻-$98)
燻得好香又夠入味~肉質唔會過乾+肉嫩
伴上既鴨子包好好味..軟綿綿又有彈性
"紅燒元蹄"($220)
燜得超腍..皮層有入口溶化感~醬汁濃而不鹹..夠稠身
份量真係超巨..食完大家都呆呆地~但味道係好既^^
爸爸話點d包送元蹄醬汁~再點"蒸饅頭"($28/3隻)
3個大饅頭=6個迷你饅頭份量..口感有彈性
"炸銀絲卷"($28/條)~因為想睇下個手功得唔得而點
炸得香口~但內層無傳統食過既絲條分明
"上海花卷"($29/2隻)
包類中..最欣賞依款~絲條分明..仲夾雜點點金華火腿粒
包身軟綿綿..味道帶點鹹香
飯後甜品.."杞子蘆薈桂花糕"($38/9件)
帶淡淡桂花香..甜度剛好~內層蘆薈肉粒都好多
口感清爽又凍凍的~整體配搭味道平均又好味
"高力豆沙"($14/隻)
豆沙餡好多..仲有香蕉片~蛋白層夠鬆彈..好香好味
"豆沙鍋餅"($52)
依個較為普通~外層半脆帶少硬
整體食店好舒適~食物有水準而份量好足..服務都好好呢
============================================
感謝 Yanomi 提供以上資料
Yanomi的網誌: http://www.yanomichung.blogspot.hk//
============================================