今日(21-3-2015 Sat)同男友過海俾o野人,咁搵個地方坐住等,我就想食紅豆冰,於是我買o野食,我買$30.00o既豬扒包下午茶餐,除o左豬扒包外,重有一隻特色雞翼,咁要杯紅豆冰,收銀話紅豆冰要$14.00,冇得話加錢換.啊.咁餐飲就要凍檸水,凍飲要加$3.00,咁就盛惠$47.00.

俾完錢,收銀提醒我,紅豆冰即刻會有,豬扒包就要等No.顯示,啊.我先攞紅豆冰,去到即刻送上唔使等,係一早整定抑或佢o地一早收到單整?但我覺得係前者,因為睇到啲冰都溶o左好多.

攪勻晒飲先,味道卻唔差,唔會好淡,紅豆未起沙但好夠腍,唔錯.
味道: 5分

之後出去攞豬扒包餐,個豬扒包用紙袋裝住,

打開睇,嘩!黑漆漆o既?

唔通係麥包?打開埋個包睇先,睇到洋蔥腍晒,覺得係煮過龍.

切開一半同男友分,我先食,個包唔係麥包,係烘脆o既包,但烘過龍,洋蔥真係煮過龍,燒汁入晒裡面,我覺得唔好食.而豬扒好彩係juicy,口感唔錯.

味道: 2分

而特色雞翼呢?

其實只係一隻蜜糖燒雞翼,我只食o左兩啖就俾男友,我覺得呢個正常冇問題,不過唔覺咩特色雞翼囉.
味道: 3分

最後o既凍檸水,男友一飲,問我係咪叫o左少甜?好清,好o岩佢.我答冇.之後發現原來糖漿係另俾.
味道: 3分

環境:
有別於其他店o既大家樂,似高一個grade,唔知係咪因為呢間坐落於甲級寫字樓區有關.
而我o地坐o個個area o岩o岩又好熱.

衛生:
印象中,係我食過咁多間大家樂中,第一間見到有蚊滋.

其他:
其實我原本想輕食一個西多士餐,但西多士餐會加埋湯麵,而豬扒包餐又係冇單一個豬扒包,其實下午茶餐使唔使食咁多o野?

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================