尋日(11-10-2014 Sat)銀行整o野,整完就等男友放工食lunch,我問佢去邊間食?佢答翠河,OK.我去攞個位先.

坐低後,我研究menu,有好多選擇,如馬來西亞咖哩,金寶白汁焗飯系列等,我就先要$47.00o既馬來西亞咖哩牛筋腩飯,要熱檸水.

估唔到,落完單全部即到,

飯還飯餸還餸上,我’撩’吓啲餸睇,牛筋腩各四件,重有件大大舊o既薯仔.先勺啲汁落返o度食先,好香椰子味,咖哩微辣,好送飯,牛筋腩.唔太大舊,但好腍,又食到牛肉味,薯仔索晒汁,又腍又夠味.真係好正,可惜飯太少,我想食晒唔留一半俾男友.

而熱檸水飲到最後都澀.

之後幫男友叫$45.00o既金寶白汁龍脷柳焗意粉,佢要羅宋湯同凍檸水,我落單,亞姐話冇羅宋湯只有中湯,啊,咁中湯啦.

好快,中湯即到係白菜湯.

隔o左8分鐘, 金寶白汁龍脷柳焗意粉到o黎,

而男友終於都到.佢飲幾啖湯,就俾啲我飲,然後佢食馬來西亞咖哩牛筋腩飯.

湯o既味道幾清甜,OK.而男友都大讚馬來西亞咖哩牛筋腩飯.好得.

之後我o地一齊食金寶白汁龍脷柳焗意粉,龍脷柳有兩件,

意粉有好多,不過金寶白汁好似唔多夠,食落,意粉唔太腍,做得出真正意粉唔係全腍o既口感,而龍脷柳就有啲o鞋,過o左龍,白汁質地杰杰地,但味道唔多夠,呢個比較遜色.

味道係3.37分, 抵食係2.5分

環境:
冷氣開得好大.

服務:
開頭我o黎到時都唔係好多人,但突然有人大嗌寫o野,即係佢o地叫o左好耐都冇人理啦.
而我其實坐低好耐都冇人理我,咁重好,因為我要等男友.
而我食剩半份停晒手時,其中一個女侍應竟然問我重要唔要? 客人會唔會咁大o徙食剩一半唔要?
之後我想幫男友叫佢o既,個亞姐因有第二啲o野做,應我話轉頭,點知轉頭都係冇o左件事,我就再搵其他人落.
之後我問佢要兩杯水,佢拎o黎時都有提醒返我o地小心熱,

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================