家人約定尋(29-5-2014 Thur)晚為端午節食飯,唔想爸爸o係屋企煮咁辛苦,就出街食啦.去美心皇宮,打電話訂枱先,但電話錄音話正在裝修至8月中至開返.咁去邊間?明星?唔好o掛?季季紅啦,可以食想食好耐o既乳豬飯,咁打o黎book位,順便訂定乳豬飯,點知聽電話o既話唔使訂,o黎到至叫就得. 唔係o掛?唔係話明要訂o既咩?

除o左大哥夫婦外,我男友,爸爸同二哥一家都到齊,我o地先決定要咩喇,乳豬飯就一定要o架喇,一隻乳豬飯要$620.00,然後散叫其他菜定叫套餐?同二哥決定叫$1,788.00o既套餐已定有乳豬飯,響螺豬肺頂蝴蝶腩炖菜膽湯同好運甜品,然後我o地揀其他6樣餸,先o黎o既係:

5. 脆香冰淋骨

顏色同糖醋骨,沙拉骨差唔多,我估味道都差唔多o掛.食落,佢炸過o既,但唔係太脆,只係香口,不過我覺得可以,而肉質都算鬆,不過有啲o鞋.而味道,同糖醋骨沙拉骨唔同,酸甜味冇咁出,應該係豉油多啲,呢個唔可以話好食,亦唔可以話唔好食,總之味道就係怪怪地咁啦.

6. 海蜇拼滷水豬肚什燒味

上到枱,唔覺有海蜇,更唔見有燒味,海蜇會唔會o係底?’撩’’撩’佢,冇.男友就問女侍應,女侍應竟然答冇海蜇o架,只係名o黎o架. 男友:咁燒味呢?佢又答冇o架. 有冇攪錯?正常人o既理解係有海蜇同燒味,點會答話係名?我真係未聽過.你估好似粟米斑腩個個都知唔係斑咩?呢個應該觸犯o左’商品說明條例’喎.

侄女就係想食海蜇而叫呢個,其實如果佢o地冇晒海蜇同燒味,大可以o係我o地落單時講,等我o地轉第二樣,而唔係咁樣呃人囉.

而呢碟正名滷水豬肚什味道一般,二哥話唔多夠味,口感OK啦.

3. 響螺豬肺頂蝴蝶腩炖菜膽湯兩煲

啲湯清到唔多夠味,響螺味完全飲唔出,湯渣亦唔見有響螺,豬肺蝴蝶腩都夠腍.

2. 枝竹涼瓜炆春邊魚皇

其實魚肉唔太多,男友話條魚幾甜,我覺得一般吧,而呢隻魚都幾多骨.

4. 豉油乳白鴿(三隻)

顏色好深,乳鴿皮有啲韌,我食到有啲羶味同覺得過鹹,麻麻.

1. 有米乳香豬

乳豬size正常,食落皮脆但唔係熱騰騰,有肉地但冇多餘肥膏又唔太;而飯呢,感覺有啲乾硬,炒得唔太香口,每人食兩件都飽.

咁剩返o既我同男友各自裝入帶返工o既飯盒,當然依然有剩,只有爸爸拎返屋企,其他各人都唔要.

第二日我o係公司叮返熱o黎食,啲飯反而重好食,可能因為夠熱啦.

7. 蟹肉扒時蔬

時蔬係小棠菜, 小棠菜又係切到大大舊,蟹肉新鮮好味,但都可惜提升唔到成個餸,或者個獻做得麻麻啦.

8. 海皇什菜煲兩個

呢個正常冇乜特別啦.

9. 好運甜品
有紅豆沙同西米露,我同爸要西米露,其他都要紅豆沙.

西米露奶味好重,都幾甜,而西米又過腍,麻麻.

我試吓男友o既紅豆沙先,相對起紅豆沙唔太甜,OK.

而餐前小食豬耳,

竟然幾好食,少少辣,唔覺唔覺就食晒.

份量:
原來呢個係12人份,所以都唔少o野,但脆香冰淋骨肯定冇12件,如果係12人,咁咪唔會一人一件囉?

服務:
由一開始打電話去book位,聽電話個個o既服務好一般,莫講話以’到時見’作結尾,就連’拜拜’都冇聲,就咁收線,好似叫你唔好打o黎咁.

我同二哥決定o左要乳豬飯,見佢寫住即叫即燒,製作須時,請早預訂o既字眼,咁我就即向女侍應講落住單先.佢話唔使o架,一落單即刻上到枱. 又唔係o掛?即係係o地o衣o家全部都係燒定?

之後同二哥又決定好叫o個個套餐同揀好菜,就叫女侍應落單,點知佢叫我揀好先,我幫你斟水先,就行o左去. 我梗係已經揀好o左叫你啦,唔通我想見多你幾面咩?

如上面提過,其實我唔知呢個係12人餐,如果落單時,個女侍提提我o地係12人餐會重好.

隻乳豬飯到o黎時,女侍應都有問我o地影唔影相?我同男友就影,影完佢剪好後,都唔放上我o地張枱,話冇位喎.重諗住上海皇什菜煲,有個好似係經理o既男人見到,都忍唔住同佢o地講:’梗係上o左隻見豬先啦.’

環境:
呢日都幾熱,我同爸爸早啲o黎,諗住o係o度涼住冷氣等,我o地o黎到,安排o左一張10人枱,但覺得冷氣唔多夠,枱與枱之間o既空間唔多夠.
3.5分

價錢:
呢餐一共$2,068.00.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================