男友契爺約男友18-1-2014 (Sat)朝早去深水埗睇佢間屋,我去到先搵位等佢o地,一切安頓好後,因為我唔知重有冇點心車,但諗住等男友同佢契爺o黎,所以冇行開,然後都見到有一架點心車,係腸粉,因為幾日前睇過報紙介紹話腸粉每日做70底,賣完就冇.所以我都即叫一個蝦腸,呢個都已經係頂點.

我唔客氣食先,一條有兩隻蝦,重要大大隻,腸粉幾滑蝦爽,都唔錯.

冇耐,佢o地o黎到喇,佢o地傾偈,我就去拎o野食,我先拎鯪魚球,鯪魚球大大粒,有口感,味道亦濃,亦都唔錯.

3. 春卷
已經凍晒,但仍脆,不過內裡o既饀應該有牛肉,呢個味道一般般.

4. 排骨
係推點心車裡有o既,半肥瘦o既排骨口感鬆軟,味道亦較得o岩o岩好,唔錯.

一次過o既:
5. 燒賣
男友一食話燒賣皮好香,不過食到鬆肉粉味,而我就覺得鹹o左啲.

6. 山竹牛肉
口感亦鬆軟,味道都係正正常常o個啲.

7. 雞紮
見佢大大舊冇欺場,內有魚肚同芋頭,魚肚大大舊,亦冇異味,雞係雞中翼位,好正,呢個好豐富.

呢o度茶芥每位$6.00

價錢: $135.00

服務:
10點左右到仍有好多茶客,行勻成間酒樓,有一張大圓枱得兩個女茶客o係o度,我問佢o地有冇人,佢o地答冇,不過佢o地要開飯.我理解到’佢o地’o既意思係員工,咁我行返出去繼續搵.終於o係大門o個邊一張大枱有位,坐低後良久冇人理,我就叫侍應開三位,佢拎埋o黎後,我洗o緊o野,一個茶客坐埋我其中一張要o既凳,我就同佢講個位有人.佢問返我幾多個?我又答三個.不過我見我右邊都重有,我話咁我移過一個位啦.但人o地走o左,侍應又未執,於是我叫人執,點知佢行o黎話你整好你啲o野先啦.我真係想問,我點樣未整好我o既o野?洗好晒斟好晒茶都話未整好?我知你o地舊式茶樓對生客o既招呼唔會好,但唔係咁樣亂噏囉.

第一輪點心車後,等好耐都冇,於是我行去煎o野食o既地方自己攞,返埋位後問男友要唔要春卷?佢答好.咁o岩點心車又o黎到,但冇春卷,契爺口快快同亞姐講春卷.亞姐好熱心問係咪要?我o地答係,佢問定要唔要喼汁同剪唔剪,然後真係走去攞俾我o地,真係好好,我其實冇諗過佢會幫我o地拎o黎.

負責煎o野食兼賣點心o既亞姐都好好人,佢o地對工作真係重好有熱誠.

而o個個侍應,除o左開頭唔係幾好外,之後佢見一個茶客走,佢都即刻過o黎收o野同抺枱;見我o地兩個壺都冇晒水,都即刻過o黎斟;我o地食晒o野亦都自動收o野.既然佢都咁勤力,開頭就唔好亂話我啦.
 

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================