尋晚(22-11-2013 Fri)爸爸出去食飯,我就同男友出街食晚飯啦,由於我放得早,所以我6:15pm已經到o左,o黎到時當然仍有好多卡位,我話兩位,女侍應安排我坐長凳o個邊,我問可唔可以坐卡位?佢答要人齊至可以.我唔想阻佢做生意,就問可唔可book 7:00pm枱?佢答冇book枱服務.咁我唯有坐o係o度等男友啦.

o係等o既時候,都有幾個客同樣未人齊,坐o係o度等,但竟然其中兩個o係未齊人o既時候都可以先轉坐卡位.眼見只剩返兩張卡位,我就打電話問我男友情形,佢答佢上o左車,應該好快o黎到啦.我就向另一個女侍應要求,佢答可以,而咁o岩有一張卡位埋單,佢o地執好枱就俾我轉過去.我o岩o岩坐定,男友就o黎到.

男友要$118.00o既鐵板紐約西冷牛扒餐配肉汁,6成熟,要羅宋湯;我要$89.00o既鐵板夏威夷雞扒餐配夏威夷汁,要周打魚湯.

好快,餐包同兩個湯都到o黎,影好相食得.

餐包好熱同軟,

周打魚湯夠杰身,裡面有啲魚肉,鹹淡適中.我又試吓男友o既羅宋湯,味道都好濃.

又好快,男友o既鐵板紐約西冷牛扒到o黎,熱騰騰,西冷牛扒大大件,

好耐冇見咁o大既扒喇,切開睇,粉紅色又厚,

食落,肉質超鬆軟,但食到黑椒味,而肉汁味,我食唔出咩肉味,但覺得鹹o左啲.

食o左幾啖,我o既鐵板夏威夷雞扒至到o黎,呢個一樣係大大份,但汁唔多.驟眼睇,兩個汁極似.

而味道呢,雞扒口感明顯冇牛扒咁鬆軟,所謂夏威夷汁又冇乜特別,亦同樣鹹o左啲.而原來呢o度有兩件雞扒,真係好大份.

未食到一半,男侍應就問我o地飲咩o野?男友要凍檸茶,我要凍檸水,亦好快就送上,

呢啲冇乜問題,不過太細杯.

而就快食完時,女侍應又自動送上雪糕,今次係朱古力味.

而裡面有朱古力粒,雪糕味道o岩o岩好又唔太甜,都幾好.

價錢:
明顯貴o左,不過份量冇減,但我覺得飲品要大杯啲,因為食完都幾口渴.

服務:
想再hightligh一樣o野,我尊重佢o地要人齊至可以坐卡位同冇book位服務,但請唔好對唔同客人做唔同o既o野,雙重標準,應一視同仁.

其他:
今次o黎啲人好似換o左,5個都係後生仔女,上次o既亞姐級唔見o左.

味道分係3.6分

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================