今(31-8-2013 Sat)朝同男友起身後因要落買餸,就同男友一齊落荃灣食早餐.食邊間好?男友話呢間.吓?!唉,好啦,又畀機會佢啦.

我o地o黎到o岩o岩剩低一張圓枱,我o地就坐低叫o野食,我揀o左$29.00o既F自選兩餸早餐,有羅宋湯通粉,我要豬肉腸兩條,漢堡扒兩件,加$5.00要牛油多士,飲熱奶茶.

男友要$28.00o既燒汁雞扒拉麵,加$2.00飲凍檸茶.

落完單5分鐘,凍檸茶先到,

茶色通透,我諗味道淡淡,不過我冇試到,男友亦冇comment.再等3分鐘,我o既熱奶茶到o黎,

加o左包糖後飲,茶味係有,但唔夠濃,奶偏多.

然後等o野食,等o左3分鐘終於到o黎,係我o個份成份出齊,

睇見件多士我已經唔高興,點解會咁燶o架? 等得耐都算,但出o黎o既質素咁樣同呢個要加$5.00,有啲唔順氣囉.塗牛油時,都挖到啲麵包碎出o黎,係証明到好到乾身囉.塗完後食,幸好未至於食到燶o既苦味,味道同口感仍算正常.

食完件多士至睇到啲蔬菜少得可憐,

得o個幾片 .豬肉腸味道淡淡,同鹹o既漢堡扒形成對比.之後到羅宋湯通粉,

份量亦唔係多,通粉腍,但好彩未至於太腍,而羅宋湯質地有啲杰,似落o左生粉水,味道偏酸.

而男友o既燒汁雞扒拉麵,亦o係我o個份o黎到後3分鐘到(所有o野都隔3分鐘到o既?)

睇見份量亦唔係多,佢食一啖後,大讚拉麵同湯OK,但雞扒好o鞋,我試吓先,拉麵有啲蛋味亦唔太腍,湯o既味道都算濃,件淡色雞扒,我搵唔到任何燒汁o既痕跡 ,食一啖,嘩!真係差到唔使’恨’,真係o鞋同冇乜味之餘,重要係食到少少雪味,慌死客人唔知係雪藏貨咁 .

而o衣o家睇返以前o既相,至發覺原來連半隻蛋都冇埋.

環境:
冷氣涼o左啲.

衛生:
o係等o野飲時,我要一杯清水,侍應都即刻畀我,冇問題;水少都冇問題,但…一睇個杯,有漬o既,好嘔心囉 ,

唔掂啦,即刻換過杯.

服務:
比之前好少少,但到走人出去畀錢時,個收銀行開o左,見到我前後都有人,共三個人等畀錢至返o黎,呢點冇問題,但問題係,收o左我前面o個客錢後,應該到收我o架啦,點知我後面,著住廚師制服o既客人想打我尖畀佢,佢竟然都想收佢先,我梗係唔畀,即刻遞畀佢先啦.

客人想打尖,你唔係由得佢吧.

綜合o黎睇,其實呢間o野重想唔想繼續做落去?

味道分係2.44分

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================