尋日(23-8-2013 Fri)公司o係呢o度擺52圍攪周年晚宴,個餐有:

1. 鴻運乳豬全體

公司同事未叫上菜時,侍應們已經拎o左出o黎o係通道上等,但由於都真係幾耐,我o地見到拎住火槍o既廚師,o係乳豬上燒一燒.

因為已經唔脆所以要咁翻燒?之後終於可以上枱,都幾細隻,一圍12人,每人都食唔到兩件,而且皮肉分離,我夾到o黎,

都未食,已經嗅到隔離同事EC o個片有(火羅)味,睇睇我呢片,明顯比正常乳豬黑.食落,係有(火羅)味囉,而味道偏鹹,底o個片肉其實唔係肉,只係脂肪而已.

味道: 0.2 分

2. 翡翠錦繡蝦仁

份量亦唔太多,

翡翠有西芹,翠肉瓜同紅,黃椒少量,蝦仁算爽口同食到鮮味,但略為鹹o左啲.

味道: 3分

3. 玉環瑤柱脯

每人一件,呢個味道正常啲.

味道: 3分

4. 百花釀蟹拑

大小做得唔係咁均勻,我揀o個隻大件啲,

食落,有啲韌,應該係炸好後放耐o左,而味道都算正常.

味道: 1.8分

5. 紅燒竹笙海皇燴花膠

上到o黎,見到有好多竹笙,侍應勺時,見唔到花膠,我話係花膠粒.分好有得食喇,

海皇係蝦肉同少量唔知咩o野魚,原來竹笙都唔太多,而花膠呢,如我所料,就係花膠粒囉,我就食到兩粒,成碗都唔膠,最好笑係女同事DW話食到膠味.而羹o既味道呢?同食街邊魚肉翅差唔多.

味道: 1分

6. 蠔皇扣原隻鮑魚

呢味應該係最貴o既菜色吧,

鮑魚口感正常冇問題,味道就食到啲海味味.

味道: 3分

7. 清蒸大海斑

唔知咩o野斑,但幾大條,呢個蒸得o岩o岩好,唔過火,係最好食o既菜色.

味道: 5分

8. 金牌脆皮燒雞

皮夠脆,肉質接近o鞋口,呢個亦都算鹹;而附上o既醬汁勁難食,有強烈酒味o既濃南乳汁,過o左火喎.

味道: 1.5分

9 – 10. 鮮菇伊麵及瑤柱蛋白炒飯

講真,兩個賣相都唔吸引,我揀o左冇色炒白飯食.呢個係見到有瑤柱蛋白,味道清淡,當清腸胃吧,但食o左大半碗後,覺得個飯硬.

味道: 1分

11. 鴻運綿綿

呢個係紅豆沙,味道唔太甜,紅豆都夠腍,屬正常.

味道: 3.2分

12. 美點雙輝

係士多啤梨味棉花糖同桂花糖,前者夠軟熟,味道唔太甜,o岩o岩好,幾好食.

味道: 4.8分

後者太軟身,我拮埋o黎只差少少都到我隻碗時就跌o左落張枱o度.之後終於拮到o黎食,呢個味道竟然係苦.

味道: 0.5分

我o地呢位12人係女全班,食完後我仍覺得唔多夠,如果o個圍全部都係男士,咁肯定唔夠啦.

服務:
我o地上到去坐低,女同事EC話口渴叫o野飲,但所有侍應都冇諗過要serve我o地,我就叫個侍應斟汽水,點
知佢話:’我o岩o岩開工,未可以斟住.’ 隔離枱同事有得飲喎,而且我理得你係咪o岩o岩開工,真莫名其妙.

我o地人未坐齊,但知道我o地張枱要加多個位,成為13個,於是叫侍應加位,點知佢話你o地坐定晒先,我先至加位. 好奇,我o地唔係o黎飲結婚酒,係公司晚宴,公司已計好晒座位,佢咁都得?

重攪笑o既係,負責隔離枱分菜o既男侍應,見o個張枱冇o左一隻匙夾餸,就攞我o地o個隻,分完放o係o個張枱;之後我o地呢張枱o既女侍應o黎分餸時,發覺冇o左,我o地話畀佢知,佢就攞返o黎用.真奇怪,點解佢o地唔去攞另一隻o黎?

而食食吓,EC o既紙巾跌o左落地,問女侍應攞過張,女侍應竟是答冇喎,公司規定每個客只有一張. @.@

環境:
係光猛同闊落.

其他:
我坐o既位置係背住個台,要睇大電視,但螢光幕顏色卻偏紅,好難睇.

其實服務同抵食都係1.5分

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================