今(14-7-2012 Sat)朝同男友起身又去食個早餐,男友話去Pokka,,我話唔好喇,又貴又要等,而佢又趕時間,去翠華姊妹店翠苑啦.

入到去搵到位,我o地就要$26.00o既沙爹牛肉公仔麵,配火腿煎蛋牛油方包,不過男友唔要煎蛋,亞姐就幫佢改要兩片火腿,加$2.00要凍奶茶.我要$26.00o既羅宋湯鑼絲粉配迷你牛油脆豬,要熱阿華田.

落完單後,好快,我o既羅宋湯鑼絲粉同熱阿華田到o黎,快到咁?之後男友o既所有o野都到齊,

我影好相後準備開餐,至發覺我o既早餐得咁少o野咋咩?(雖然鑼絲粉多o左牛腩)睇睇餐牌,啊,係有迷你牛油脆豬,記得佢o地未o黎先.之後見到o黎o緊o勒,又影埋相就開餐.

我o既羅宋湯鑼絲粉味道係酸酸辣辣,辣味係由tabasco發出,越食喉嚨就越辣,鑼絲粉好腍,係過腍,顯然煮o左好耐,冇乜人叫叫個餐,而牛腩就唔夠腍,我叫男友試,佢話羅宋湯合格,最後佢飲晒啲湯.不過我覺得都係o係寶石大廈執o左o個間金銀島o既羅宋湯o既味道好啲.

迷你牛油脆豬,

面o個層係夠脆,不過我嫌佢太薄,牛油塗得僅僅夠.

而男友o既呢,我就食半件牛油方包,揭開睇,嘩!牛油少到喊,只係薄薄咁塗一下,不如淨係畀方包算啦,男友呢個早餐整唔抵食,因為沙爹牛肉公仔麵份量都係唔多.

服務:
我o地入到去,見剩返單人卡位,就想行去另一邊,未行到去,有個男侍應話o個邊冇晒位,OK冇問題,我o地行返o黎呢邊,剩返o個張單人卡位同一張貼住收銀o既六人枱,我o地就坐六人枱.有個女侍應走o黎叫我o地坐o個張單人卡位,我梗係唔肯,o個o度又迫又要嗅香味,真係啋佢都傻,佢要叫都應該叫一個人o黎o既客人啦.

坐低冇耐,只睇o左餐牌一次,亞姐就即刻走o黎問食咩o野?男友就快速決定叫o左,我話等等先.但亞姐又快速介紹羅宋湯鑼絲粉,話酸酸甜甜幾好食,咁我就決定要呢個.

外面不時落啲好密o既雨,客人走入o黎一般都唔會好似入商場咁,攞個膠袋入住啲遮,因為根本都唔會諗到茶餐廳會有.而有個客入到o黎就即衝入去,個女收銀好惡咁叫佢攞個袋入住把遮.我心諗,使唔使咁惡呀?之後啲客人個個都係直入,但佢o既語氣就好返好多喇.

亞姐密密咁收碟,我驚佢會連男友飲剩兩啖o既凍奶茶都收埋,所以我都即刻伸手揸住個杯.

價錢:
睇返年頭呢篇食評, http://www.openrice.com/restaurant/sr2.htm?shopid=37820啲早餐又加o左$1.00,而且今次o既牛油方包內o既牛油重少過上次,只係半年啫,分別就咁大?@.@”

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================