前日(27-5-2012 Sun)朝早又同男友起身去食早餐,前一日佢已經話o黎百佳,只係我話唔o黎,要去荃滋味,咁呢日就返佢o黎啦.
o黎到大約係10:23am左右,已經好多人, 我同男友被安排坐o係兩張靠商場入口玻璃牆o既雙人枱o既其中一張,但其實向街o個邊係有吉卡位未被人坐,可能方便僅有o既店員服務客人o掛.
男友話坐得唔係咁舒服想走,我話算吧啦.
咁我o地就揀o野食喇,同舊年一樣, (上年食評: http://www.openrice.com/restaurant/commentdetail.htm?commentid=2174538)早餐價錢係取決於要咩o野飲品,男友揀o左$48.00o既凍Cappuccino,要8號o既白菌漢堡配煎蛋火腿鬆餅及白菌忌廉湯.
我就要$22.00o既凍北海道朱古力,要7號o既班戟伴炒蛋三文魚,法蘭克福腸及白菌忌廉湯.
等o左幾分鐘,男友o既凍Cappuccino先到,
我覺得份量少,再得差唔多5分鐘,我o既凍北海道朱古力至到,
使唔使咁耐呢?我飲吓,朱古力味都算濃,冇問題.
再等好耐好耐,男友o既白菌漢堡配煎蛋火腿鬆餅及白菌忌廉湯到o黎,侍應放低後,我想問佢係咪欠個湯未到?但睇真啲,原來一次話o黎齊晒,個白菌忌廉湯真係一個細杯係裝住,真係少得可憐.
我同男友先share食,件牛肉漢堡好鬆軟,男友話係人手擠,唔係好似麥當勞咁用機器壓o個啲,佢話好食,而鬆餅同煎蛋火腿都冇乜問題,男友先飲o個杯超矜貴o既白菌忌廉湯,佢大讚好飲,我未試,一陣至講點好飲.
o係我將男友o既牛肉漢堡鬆餅切開一半時,我o既班戟伴炒蛋三文魚,法蘭克福腸及白菌忌廉湯到o黎,
睇睇pet炒蛋三文魚只得好少,而杯白菌忌廉湯比男友o個杯更少,我先食炒蛋三文,炒蛋凍同唔滑,三文魚同法蘭克福腸冇問題啦,沙律菜新鮮,醬亦較得o岩o岩好,合我口味.
而我移開面o個件班戟後,發覺原來下面o個件唔係同佢一樣咁大塊,只接近佢o既三分二,覺得有啲搵笨,呢份早餐我都係同男友share食o既,佢見到件班戟話似鮑魚.
我搽好牛油同蜜糖後食喇,佢比麥當勞o既厚身,男友話蛋味濃啲,又話麥當勞o既糖漿係苦o既,我食真啲,咦?!呢o度o既糖漿原來係非一般糖漿,而係蜂蜜,真係可以沖蜜糖水飲.
而白菌忌廉湯呢,佢好足料,係有好多白菌,湯亦夠杰身,味道算濃,係好飲,不過真係太少喇.
其他:
等食物足足等成24分鐘至到齊,可能呢o度想營造出一份悠閒感覺畀人,但我覺得有啲製造好生意,好受歡迎o既假象,製造出人龍,令人覺得呢o度啲o野又抵又好食.
睇返menu比較,原來Cappuccino加o左價,男友上年食o既日式咖哩牛肉意粉奄列冇o左,我o地呢日食o既兩個餐都係新加o既.
最後,我o地食完呢個早餐時係大約11:15am,之後我冇乜體力勞動,到2:45pm就開始覺得肚餓,比我平日朝早食一碗麥片做早餐就返工更加快肚餓.
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================