尋日(10-1-2012 Tue)終於拉到爸爸同我同男友o黎太平館食飯,為o既係馳名乾炒牛河,瑞士雞翼同梳乎厘.我book o左枱,佢o地先到,我就放o左工趕過o黎.

咁男友就先點$368.00o既招牌二人套餐同$108.00o既梳乎厘.

招牌二人套餐揀o左海龍皇湯.

同上次09年10月31日食o既一樣,龍蝦味好濃,但鮮蝦肉冇之前咁多,而且冇o左魚塊,L不過爸爸話鹹,我糾正返佢唔係鹹.
味道: 4.8分

餐包

亦同上次一樣,冇唔同.
味道: 4分

乾炒牛河

唔大碟,每條河粉都好深色,食吓先,大大件牛肉好軟熟,好入味,食到河粉有豉油o既鹹味.諗返起以前細細個食o既乾炒牛河,牛肉唔會咁軟熟,河粉都唔會上晒色,亦唔係好夠味.
味道: 4分

煙肉炒雜菜

雖然話有煙肉炒,但一啲都唔惹味,只食到雜菜o既原味.
味道: 2.7分

同瑞士雞翼(6隻),但因禽流感冇活雞供應,而太平館堅持唔用雪藏雞翼,所以冇得食,只可以食燒乳鴿1隻.

我同男友食上截,迫爸爸食晒下半隻,鴿胸有好多肉,呢個唔算好入味.
味道: 3.5分

男友覺得可以加多一樣,佢就揀o左又係馳名,$135.00o既砵酒燴鮮牛尾

呢個同樣唔大碟,牛尾好腍有牛o既羶味,男友讚好食.不過伴碟o既薯仔唔夠腍.
味道: 3.5分

而男友又覺得我爸爸無飯不歡,所以都叫一個白飯,侍應話係碟庄,唔係一碗,咁我話咁要一碟啦.
白飯又唔係好大碟,爸爸多數加入燒乳鴿o既瑞士汁o黎食.我覺得白飯唔太軟熟.而埋單至見到原來白飯係$10.00.
味道: 2.8分
PS: 但我o地食完晒o野,我睇到另一枱客o既大碟過我o地好多.

最後梳乎厘到o黎,呢個雖然重係用大玻璃盤焗製,

但感覺細o左,冇之前咁大.味道同口感就一樣,不過今次呢個焗得好啲,冇上次食到有啲變o左蛋糕o既質地.

味道: 4分

最後係餐裡面o既西餅甜品,

亦都一樣係70年代o個隻,味道都一樣.
味道: 3分

餐飲就畀o左爸爸同男友飲,爸爸要熱檸水,男友要熱檸茶,爸爸一飲就要挑走檸檬,因為澀.

服務:
我一坐低,一位好老o既侍應遞本menu畀我,我話已經落o左單,佢答我o地只係叫個2人餐,問我使唔使加o野我知佢係善意,就問佢係咪怕我o地唔夠食佢答唔係,只係幫我就返時間,加o左單梳乎厘最後至到.

啊,我答冇問題,我o地調轉次序o黎食都得.J

不過o係走o既時侯,我覺得有個後生o既服務麻麻,爸爸同男友至講,個好老o既侍應因為老闆唔會炒佢o地,所以好寸.我問咩事啊佢o地話我未到時,佢o地落單話要瑞士雞翼,個侍應就話:’你o地頭先聽唔到我同後面張枱講冇雞翼咩’爸爸話佢想話佢o架喇,不過最後都冇講到.

男友同我講可能佢同好多圍枱講,講得多所以覺得煩,咁叫老闆寫張紙擺o係張枱o度嘛.

環境:
由於爸爸佢o地先o黎,所以好少人,侍應問佢o地想坐邊張枱,爸爸竟然嫌卡位窄而揀o左張長方枱,但張枱被冷氣機吹正,佢同我都凍,佢食完o野未等埋單就出去企.

價錢: o衣o家睇返張單再同上次食評o既比較吓,嘩!二人餐加o左一成六,原來鮮蝦沙律改成煙三文魚鮮蝦沙律,同加o左一個煙肉炒雜菜.

第一次o黎o既食評: http://www.openrice.com/restaurant/commentdetail.htm?commentid=2040376

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================