今(27-8-2011 Sat)朝同男友起身後,同佢落荃灣食早餐,佢就返工我去買餸.
由於佢時間趕趕地,我又唔想去大家樂,就問佢呢間好冇?佢話好.入到去,我o地被’招呼’到一張三人卡位,男友要$24.00o既自選雙併麵早餐,揀o左沙爹牛肉火腿麵,加$2.00要凍檸茶少甜.
我要$27.00o既美式扒早餐,要雞扒加$2.00飲凍檸水.
落單唔夠兩分鐘,男友o既沙爹牛肉火腿麵到o黎,即係話麵一早已經整好,只係加餸.然後兩杯o野飲到o黎,我o既凍檸水都幾甜吓.
之後我o既早餐到o左,有雞扒,茄汁豆同煎蛋,件炸雞扒熱辣辣,幾夠鹹,煎蛋焗豆呢啲冇乜問題.
而迷你牛油豬仔包就後上,又係熱辣辣o既,好夠脆,可惜牛油唔多夠.
服務:
開頭入到去,o個邊只有一張近神枱二人卡位,咁我當然會行埋去另一邊搵位,見到一張吉o既四人卡位,想行去.個亞姐就指返我見到o既第一張卡位,我唔出聲照行,佢望望話,啊,o個o度都有張.佢知我想坐o個張,但另一個亞姐又指另一貼住玻璃牆o既卡位,叫我坐o個張.o個張即係我最後坐o左o既3 人卡位,其中一個位會有啲頂手o既.
之後有一個男性客人o黎,佢就坐o左o個張4人卡位.我唔明白,點解兩個人唔可以坐張4人卡位,一個人就可以?而且我同男友合共拎住三個袋呢.
上菜速度超快,我睇住個師傅由炸爐夾o左我件雞扒上碟畀我;亦睇住佢由焗爐攞個豬仔包出o黎摸,唔夠脆就放返入去焗多一陣.
呢o度o野食都OK,不過請留意吓,唔好指定客人坐邊張枱好啲.
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
