今日(28-5-2011 Sat)男友要o係Meag Box做o野,佢問我過唔過去同佢食個晏,唔….好啦,橫豎未去過咁隔涉o既Mega Box,同可以食完o野返屋企至洗冷衫.

我同佢大約11:05am至到九龍灣地鐵,去到Meag Box搵o野食,除o左14同15樓o既酒樓因集中最易搵外,其他食肆位置都比較散,我o地經過呢間,見咩米芝蓮都有推介,就試吓啦,時間都o黎到11:45am喇.

o黎到,我o地比安排o係最入o既四人枱,即係廚房門口,我o地睇menu啦,一場o黎到,唔係食普通點心o掛,揀啲最特別o既點心先.

1.$12.80o既日本富士蘋果酥

呢個o黎到時,我以為係叉燒酥而畀錯我,亞姐話係日本….我就即刻記起,係富士蘋果酥,我唔記得o左.

呢個一啖咬落去,就食到玉桂味,

始終用蘋果做o既甜品一定要有玉桂.內裡o既餡又熱又腍,食完一個唔覺得佢甜.但食o左下面微辣o既拍青瓜後,再食半件就覺得味道好得,甜甜地同好食好多.
味道: 4分

5. $28.00o既拍青瓜海蜇

呢排男友唔知做咩愛上拍青瓜,睇外型,拍青瓜似係用手拍,呢個酸甜辣味有齊,而且青瓜夠爽,男友大讚,重話畀10分.而冰涼o既海蜇就因為冇咩調味料,所以覺得遜色o左啲,不過我就一件拍青瓜一件海蜇咁食.
味道: 4.8分

2.$13.80o既花枝脆油條

又一啖咬落去,竟然食到濃郁o既鮮魷味,好強啊.而外層好夠脆同離唔開油膩感,不過都好少.而男友話呢個味即係尋晚電視播’街坊廚神’o個個?我答呢個冇咕嚕汁,而人o地o既係用油炸鬼包…..男友即搶住話油條咪就係油炸鬼囉.係喎,估唔到尋晚睇完,今日無獨有偶地食o左.

味道: 4.9分

3.$11.80香蕉豆沙焗軟餅

呢個同下面o既話梅豬手差唔多時間到,原本想留到最後至食,但驚凍o左個皮就變硬唔好食,所以先食呢個.

呢個個皮果然好軟熟,內裡豆沙餡多過香蕉,香蕉就係擺o係頂部o個一片,

佢只係一個點綴,但都OK,而豆沙餡唔太甜,最開心係成個熱辣辣同真係軟o既,真係唔錯.
味道: 5分

4.$28.00o既話梅豬手

男友食一件就即大讚,話酸酸地幾好食,重想叫白飯食添.哈哈,真係咁好食?我試吓先,嗯,係有話梅o既酸味,同樣有薑o既辣味,感覺比用甜醋清新一啲,豬手夠腍,但肉唔多;

而蓮藕呢,男友話酸蓮藕就唔係咁o岩味.我又食吓先,我反而覺得接受到,因為蓮藕都唔係咁’索’啲汁.男友就連薑都食埋,話好醒胃.
味道: 4.5分

其他:
一坐埋去就有小食,其他食lunch唔使掛?

小插曲:
食到接近尾聲時,見到有個人由我對住o既一間密室行出o黎企o係o度叫侍應(男友就背住佢),我覺得佢似o衣o家無綫播o緊’誰家灶頭無煙火中’,同一個男友話靚靚地o既女演員同局o既男演員(一時唔記得個名),但就係年輕版,同男友講完冇耐,一個肥肥o地o既男人邊講電話邊行出去,我覺得佢似同劇o既另一男演員－現任保安局局長李少光個仔.

好耐,佢行返入o黎喇,我睇真啲,果然係佢,即係話頭先o個個應該係揚明(突然記得佢個名),唔通呢套劇o既演員全都o係o度食o緊飯?唔知至靚仔o既陳智桑o係唔o係o度呢?

呢餐埋單$130.00.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================