今日(27-4-2011 Wed)繼續過o黎灣仔人做半日o野,約男友同我o係呢區食飯,食完我至返荃灣公司.

佢上網查到呢間’好o野’,就先o黎搵位,點知我老闆娘唔提早放我食lunch,攪到男友先叫o野食,我去到,佢已經食完佢$65.00o既海南雞飯套餐等我,真係好唔好意思.

而佢都飲o緊一杯另叫o既拉茶.

我都試吓,係淡淡的唔甜o既一杯奶吧.

之後我叫個$65.00o既餐,又唔記得咩椰汁咖哩牛肉配油鬆餅,要可樂.

好快,餐湯到o黎,細細碗,上面有脆片,真得意,攪吓佢,原來係粟米湯,

都有啲蛋花添,而味道就係清清淡淡咁.

然後椰汁咖哩牛肉

同油鬆餅

都到o黎,牛肉粒好鬆軟,牛味都濃郁,薯仔亦好腍,而成個餸對我o黎講係辣,可能入晒味啦.而開頭油鬆餅蘸汁食時唔係咁覺辣,但食食吓都頂唔住,唔蘸太多喇.

食完,男友都拿拿淋要埋單,我o既甜品都即上,係咩o黎呢?係一件糕,

咁又係件咩糕?答案係唔知,只知係冇甜味,只知有啲西米,口感係腍腍地.

價錢,男友埋單時拎埋張單,我睇睇,原來佢杯拉茶都要$30.00,好貴呀!

小插曲:
我食到尾聲時,隔離張枱後過我o地o黎o既客人點完菜後,問我o地係咪香港人,問我o地覺得呢o度啲o野食點.佢話佢o地係馬來西亞人,o係o個邊開餐廳,呢次o黎香港係想睇可唔可以o係香港開返間馬來西亞餐廳.我見佢o地飲o緊杯珍多冰,就問佢o地覺得點?佢o地話難飲.

正常o既,始終都要改少少就返本地人口味,否則就冇生意o架啦.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================