尋晚(30-3-2011 Wed)同男友約男友人LKH出街食晚飯,難得佢肯出o黎,LKH話叫埋女友人DC,好吖,冇問題.

約好晒,我o地個個各自上去坐住等,而原來LKH o既太太都可以o黎,真係好.我o地三個坐住等,諗定少少o野同落單先.不久LKH太太到o黎,咁我o地就諗埋其他啦.

而係烏烏龍龍o既情況下,上o左是日例湯同順德碌鵝.但怕啲湯凍,我o地唔打開住喇.

不過LKH話先試順德碌鵝,啊,咁好啦.

1. 打開個蓋,好香,鵝o既肥度適中,唔係太肥,肉炆得好夠腍同入味,其實我o地都食唔出有咩材料,但我覺得有少少酒味,墊底都有芋頭o係o度,但唔入味.呢個個個都讚好食,啲汁送飯都一流.
味道: 4分

2. 我o地等o左好耐,DC終於到o黎,我o地就叫可以起菜同勺湯,湯係木瓜花生雞腳煲大魚尾,

湯o既顏色有啲奶白色,但飲落味道又清清地冇味精,木瓜用上青木瓜,我第一次飲青木瓜煲o既湯,又幾好味喎,湯o既材料全部都煲到腍晒同出味.
味道: 3.3分

6. 魚腐雜菜煲(係$168.00買二送一所送o既)

叫呢個o既原因係一來冇乜菜,二來見佢o地話手打魚腐.呢個都幾大煲,我見都有鯪魚肉,但照顧我o地朋友從來冇勺畀我,不過算數.
我覺得魚腐OK,唔係太滑,魚肉比例好似唔多,但又食唔出豆腐味.雜菜我就冇留意有咩o野菜,呢個冇乜特別.
味道: 3分

4. 銅盆污糟雞(半隻)($168.00買二送一o既其中一個餸)
o黎到,大大個用錫紙執住,侍應幫我o地剪開用撈返好後,睇睇,嘩!個盆就大,雞就得o個啲咁多.

呢個好香甜,但其實咪只係洋蔥炒雞,不過就真係有啲火喉,幾好咁o既.但點解叫做污糟雞?
味道: 4分

3. $78.00o既大良炒鮮奶
原本男友想食焗魚腸,但LKH話唔食,我o地就佢啦,佢太太就話要叫呢個,冇問題.
o黎到,都幾大碟,

LKH太太大讚好滑,又係喎,都OK,底都墊有炸米粉,我就食唔到蝦仁,因為太少喇,但就食到帶子.
味道: 4分

5. 順德小炒王($168.00買二送一o既另一個餸)
開頭LKH問侍應呢個有咩o野?侍應答西有西芹,蝦仁,腰果咁炒埋.哦?!咁好普通咋喎,不過由於我o地都幾多肉,所以叫呢個.

o黎到,都唔係只得o個三樣,重有黑木耳同帶子.

呢個都OK o既,不過都有好多蝦乾,o衣o家睇返相,原來有蝦仁,但我又一隻都食唔到o既?奇.
味道: 3分

7. 最後係送o既糖水,係紅豆沙,

呢個唔太甜,都可以o既.
味道: 3分

環境:
好細,只有兩張大枱同約6張細枱,不過有兩間獨立房.

而我o地都叫做好早o黎到,只有兩張細枱o既客,只因等DC等得太耐,之後成間o野full晒,啲位就好迫夾.

服務:
都唔錯,密密斟水.

其他:
呢o度有啲o野係冇寫價錢,如碌鵝同例湯,我覺得呢樣唔係幾好.

呢o度o了o能在地點,而唔係啲菜,因為其實好多菜都係好普通o既o野,只係改o左啲隱隱約約o既名.

不過有啲係尋晚冇食,下次可以再o黎食其他特別o既菜,如梅子脆鱔.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================