一星期前女友人JY約埋舊同事尋(15-1-2011 Sat)晚食飯,先約定o黎朗豪坊等.齊人喇,女友人N記得呢o度有泰國餐廳,就話o黎呢間.
我o地有七個人,不過其中兩個有事,係唔食飯,傾完偈先行離開o既.咁剩返五個人食,我o地叫菜喇.我睇到有個$128.00o既唔辣脆炸原條烏頭,就覺得好奇,所以叫呢個,其他由N發板.佢叫o左:
1.柚子蝦沙律
柚子好多,有腰果同蝦仁,蝦仁爽,腰果脆,柚子唔酸,我覺得辣o左啲.但個個食o左下一個沙律至食呢個就話好辣.當我都食o左下一個再食返呢個時,都覺得呢個係好辣.
味道: 4.8分
2.酸辣無骨鳳爪沙律
呢個酸辣程度可以接受,白色o既無骨鳳爪好方便食,又爽,食完一隻又一隻,不過食食吓,佢o地o既男舊同事B發現有牙簽,我o地呢班唔識食o既人就疑惑應唔應該出聲.我話問佢o地其實係咪應該冇牙簽?佢o地問女侍應,女侍應答唔應該o既,牙簽係用o黎拮香葉包雞.佢o地主動換過個畀我o地.
咁我o地都有另一個酸辣無骨鳳爪沙律.食完真係想o係咁凍o既天氣下,走出街擘大口吹凍返.
味道: 5分
3.鹹魚炒芥菜
食o左兩個辣辣沙律後,食飯啲唔辣芥菜先,點知熱烘烘o既芥菜都係辣o既,唉!其實只有成張枱,只有一個食得辣o既N,使唔使咩o野都叫辣呀?我食啲啲就放棄啦,但最後都夾一粒鹹魚食,只有鹹味又唔香.
味道: 3分
6. 芒果雞肉炒飯
呢個係後加o既,因為JY話想食隻,而N話諗住叫白飯,佢o地o既男舊同事P話睇吓白飯價錢….經過佢o地一輪討論後,決定叫多個炒飯先,唔夠至再叫.咁我發板,揀o左呢個咁新奇o既炒飯.
o黎到,都唔係好大碟,芒果肉唔酸,飯粒唔散開,雞肉唔係咁夠味.不過食完三個辣o野食呢個就舒服晒.
味道: 3分
4.我叫o既脆炸原條烏頭
落單時女侍應問我o地係咪要原條,JY就玩佢問係咪有半條?我同女侍應講佢講笑咋.咁女侍應就介紹呢個係起o左骨出o黎都炸埋,好脆口,汁係酸酸甜甜o既.
o黎到,都幾吸引,有脆漿o係面o既,但食落口唔脆o既?而且只係微暖,唔蘸啲汁就冇味,蘸o左就好食好多.
味道: 4分
5.酸甜豬肉
呢個等好耐,催極都未到,女侍應話要炸.終於到o黎喇,賣相同菠蘿咕嚕肉一樣,食落,味道都一模一樣,但佢炸o左都唔脆,又係腍o既.
味道: 2.8分
7.兩碗白飯,佢o地話要酸辣無骨鳳爪o既汁撈o黎食,我冇食到.
8.JY話想飲o野,但佢怕飲唔晒,就同P share一杯龍眼冰,我冇問佢o地好唔好飲.
9.咁我要杯好似$25.00o既珍多冰啦,
珍多冰只有綠色o既大菜糕,淡茂茂.而杯冰呢,就好夠椰子味,亦好夠甜,冰已經係碎但唔多,好味.
味道: 4.5分
10. 芒果糯米飯 X 2
呢個係N叫o既,我諗住係佢o地唔叫o野飲o既人食,點知佢o地都分畀我o地,甜甜地o既白糯米軟腍腍兼煙韌;紫米就唔多夠腍;芒果有啲酸.
N佢o地覺得唔夠分就叫多一個.
味道: 4.5分
食完去toilet我至知飽,真係唔覺唔覺.
埋單$673.00
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
