尋日(25-10-2010 Mon)約o左女友人CT食晚飯,佢上Openrice揀o左路德圍一間叫蘇豪o既café,但我o黎到時至知原來執o左,Openrice o既資料真係有時唔update.
見佢開頭揀呢種,應該想食西餐同坐得舒服啲,o岩o岩撞到佢時我就介紹呢間啦,因為成個路德圍最似樣o既就只有呢間同椰林閣,後者我三月時食過,覺得一般.
由於時間尚早未多人,我o地坐入面.CT揀o左$48.00o既洋蔥汁牛仔骨鐵板餐伴薯菜,我就要$45.00o既洋蔥汁雞扒司華力腸鐵板餐伴薯菜.一會,女侍應返o黎同我o地講牛仔骨賣晒,咁CT就改要同樣$48.00o既洋蔥汁大蝦雞扒鐵板餐伴薯菜.
之後,CT o既先到,大大份,幫佢影相先.

然後到我o既,睇見有好多薯條,成坐山咁高.

食落,雞扒同司華力腸都冇乜問題,不過我o既雞扒縱使由兩件組成,但都比CT o既少,而洋蔥汁都唔太多.薯條當中亦有薯角,味道同樣冇問題啦,不過o衣o家至諗返起,點解冇菜o既?一丁點都冇.

之後叫餐飲,我o地同樣加$6.00要凍飲,我要凍奶茶,CT要凍檸茶少甜.o黎到,都算大杯,但,唔太甜,唔通女侍應以為兩杯都要少甜?不過算啦,唔好飲咁甜喇.
然後女侍應問我o地上得雪糕未?送o既.我o地答可以吖.o黎到睇吓幾大個?有兩個球o架,但’o畢’落去,原來係空心,兩個雪糕球其實係由一條條狀雪糕形成,咁疊埋就似兩個雪糕球,咁其實實際份量只有一個,咁都被佢o地諗到,真係服o左佢o地.雪糕係雲呢拿味,亦冇問題啦.

食完我o地就傾計,但驚覺原來都有好多客人,我o地就走啦,步出門口,CT至話呢o度冇湯同餐包咁就好囉.係喎,佢啲餐冇呢兩樣o野,連餐飲都要加錢,咁五十幾蚊一個餐,其實唔平喎.
點解呢頭廸卡倫咁高水準o既餐廳會執o左,益o左呢間o架?
環境:
坐入面會舒服啲,因為全部都係梳化椅.
衛生:
一般喎,有隻o野成晚係咁飛o黎飛去,好煩.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================