今日(10-8-2010 Tue)同男友起身後,諗去邊o度食早餐,o黎到兆和街,見久遺了o既合發餐廳,就走入去啦.點知中招,所有o野食都轉晒翠華o既,都知道佢o地被翠華收購o左,但名仍保留’合發’兩個字,諗住應該重有合發自己出品o既o野,點知係冇o既.
唔入都入o左o黎,唔坐都坐低o左,唯有叫o野食啦.我叫o左個$22.00o既法蘭西特長熱狗,要凍奶茶.男友要$20.00o既特脆豬扒飽,飲熱檸茶.
好快,我o既凍奶茶到o黎,有大半杯係冰,茶味好彩仍夠.
等好耐,男友o既熱檸茶至到,我留意到係原來係廚房儲埋一次過出幾杯,真係掂.
再得多陣,距離落單時間約7分鐘,特脆豬扒飽到o黎,上碟時已切開一半,有生菜,醬瓜,但我見啲生菜邊變o左紅色,好心廚房唔好畀呢啲人啦.
我同男友一人一半,食落,豬扒冇乜味,包就真係好脆,味道就全靠沙律醬同醬瓜.
味道: 4分,其中1分係畀脆豬仔包同醬瓜.
同男友分開慢慢食,食完重要等好耐,我o既法蘭西特長熱狗重未到,我睇住廚房係咁出特脆豬仔包同其他o野,想叫經理跟o既時候,就見到個女人攞個長碟,我就覺得佢開始整,果然,終於係整呢個,真係有冇攪錯?呢個比特脆豬扒飽更易整,更少工序,佢都要拖,原來廚房唔係順order次序o黎整,佢鍾意做邊樣就做邊樣,得o架喇.
呢個熱狗同樣有生菜,蕃薯片同醬瓜,有芥末同茄汁,就係咁.食落,包係暖暖地,咁當然唔係脆,法蘭西腸冇味,又係靠啲醬汁味道,真係好一般.
味道: 3.5分.0.5分係男友話食到芝麻香而畀.
埋單收$70.00,咁貴o既?原來呢兩個唔係餐,係散叫o既,真係好唔抵.講真,如果我知道呢間所有o野食已經轉晒係翠華o既,我唔會o黎囉,同樣畀咁貴o既價錢,但呢o度迫夾啲同,又冇電視,點解要o黎呢間?睇o黎都係冇下次.
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
