尋晚(27-10-2009 Tue)約同男友食飯,原本佢話去太平館,但由於我公司搬office,尋日入伙同同事叫o左好多o野食做晏,所以仍好飽,於是約返o黎荃灣,諗住食熱狗の家,點知未到7點半o黎到,竟然話閂o左門,貼o左張紙話賣晒.真係有冇咁犀利啊?
咁點呢?諗到前日睇完戲,經過荃興徑,見到呢間o野,於是同男友拖住疲累o既身軀行到o黎,見有位坐,就即刻坐低諗o野食.
同男友叫兩個餐,男友話第一次食加上熱氣,所以一定要試牛肉漢堡,咁就要$30.00o既牛肉漢堡飲可樂,我要$25.00o既芝士豬柳漢堡,飲凍檸檬菜蜜.
我入去買,其實都唔肯定套餐係咪好似麥當奴咁,有漢堡包,飲品同薯條三樣,於是都問一問,原來只係飲品同薯條二選一.啊.但個男人就補充,o衣o家買套餐,唔理你揀薯條定飲品,都會免費送一杯汽水.
咁我發版啦,男友o個個要薯條同可樂,我o個個要凍檸檬菜蜜同送o既雪碧啦.
坐低等o左一陣,o野食到齊喇,但點解少o左一杯送o既可樂o既?於是問問o係門口派傳單o既女仔,佢睇睇單,話係喎,就幫我攞返杯出o黎,唔該晒.
齊晒喇,影埋相就開餐喇.睇見兩個漢堡就好開心喇,因為好豐富,顏色又靚同生菜又多.食落,我件豬柳好似遜色啲,我食唔出佢o既味道,醬汁微甜,生菜同兩片蕃茄片都好新鮮,幾好味.
味道: 4分
男友就大讚自己o個個牛肉漢堡,我睇吓,件牛肉幾厚,食落,鬆鬆軟軟咁,重食到淡淡o既牛肉味,好過麥當奴好多.
味道: 4.8分
而薯條呢,亦唔係麥當奴o個種,呢種唔係脆口,至於味道,我覺得呢隻一般,不過佢係熱辣辣o.既.
味道: 3分
我杯凍檸檬菜蜜,開頭冇留意有檸檬,所以冇’篤’就咁飲,菜蜜味道清清,幾好味.之後發現有檸檬,’篤’o左之後,出o黎o既檸檬味,令菜蜜味道更清,而原來,檸檬都有好多片.
味道: 4分
順帶一提,呢o度o既凍飲,冰o既份量唔多,唔錯.
下次有機會會再試.
服務:
好好,出面派傳單o既女仔好主動,我o地唔知入面叫我o地攞o野,佢就幫我o地攞出o黎.
入面收錢o個個都好有耐性.
環境:
細舖仔,裡面就只有兩個位,要坐o係舖外街邊,不過仍可.
而裡面都有啲調味料.
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================