尋晚(15-8-2009 Sat)同男友同一大班人BBQ,10:45pm要離開交場,我o地打算去就近o既糖百府食冰,叫埋友人H同佢老公,到走o既時候,原來重有同佢o地熟稔o既一男兩女友友,而SZ同另一個男友人都好,我o地就總共9個人一齊食冰.
o黎到,見到門口好多人,都攞o左飛先,要等21個No.,咁我o地就去黑布街o個個睇睇,好似少啲人,但要等50個No..咁唔等啦,問過晒所有人係咪一定要食冰?大家都答唔係,咁就轉呔諗第二間.SZ同佢友人決定發記,於是又行返轉頭到豉油街,o黎到.都唔係好多人,等o左一陣就有位.
坐低後,我揀o左$21.00o既榴槤啫喱+豆腐雪糕o既甜品.男友同其中一個女友人要西瓜黑珍珠o掛.其他人有的要芒果沙冰,楊支甘露,蜜瓜沙冰同$29.00o既鮮芒果啫喱+豆腐雪糕甜品.
等o左好耐好耐,兩碗西瓜黑珍珠先到,女友人o個碗有一大舊o既冰,我男友o個碗都有,但唔大舊.
之後兩杯芒果沙冰到o黎,都幾大杯吓.然後係楊支甘露同蜜瓜沙冰,最後就係榴槤啫喱+豆腐雪糕同鮮芒果啫喱+豆腐雪糕.
一眾人見到我o個個外型幾靚o既甜品都紛紛影相同研究.睇到下面紫色啫喱裡面有舊o野,唔知係咩?我就決定推塌面上o既豆腐雪糕o黎睇,原來係一舊榴槤肉.
研究完畢,我都食豆腐雪糕先,豆腐味係有,不過淡淡的,要專心食至食到.榴槤肉夠腍亦夠甜,但配合原來係提子味o既啫喱時,男友試食話好唔得,話冇理由榴槤會配酸o既o野食.但我又唔覺有咩問題喎,提子味都唔突出.只係感覺好特別,一啖提子啫喱,一啖榴槤果肉,覺得冰涼到有少少'拮拮'地囉.
個個都話呢個有創意但配搭錯o左.
服務:
有個亞姐都幾惡,男友人J挨後o黎幫我o地影相時,個亞姐好惡咁叫佢坐埋啲,J未影就先讓佢行過後,然後又挨後影,點知個亞姐好快又行返轉到要過,佢又怒目而視.
之後隔離張枱一個廣東話唔正o既男顧客,食一碗唔知咩有芒果肉o既甜品,同亞姐講,呢碗o野冇味.個亞姐只應佢一句,招牌o黎個喎.顧客叫佢自己試吓,佢唔應人就走o左去囉.
女友人H笑說,招牌梗係冇味啦.
咁我問食楊支甘露o既SZ覺得佢o個碗點?佢答芒果肉唔太甜,有少少酸囉.
我o地食完行返出去時,一個女侍應(我冇留意佢幾大),大聲叫一枱好似猜o緊拳o既客人唔好咁嘈.我即時,乜咁夠膽咁樣命令客人?
呢o度o既亞姐個個都訓練有素喎,對啲存心攪事o既人係o岩,但對啲合理,冇攪事o既就唔可以咁囉.
呢餐埋單$204.00

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================