前日(8-8-2009 Sat)男友有公事要拎o野上大陸,佢順便叫我跟佢上去,去佢同佢老闆食過,話好味o既燒烤店食晚飯.

我o地大約7:40pm o黎到,由於今日冇乜風,所以唔揀出面坐,走入室內,暫時未有客人,店內店外都充滿o左羊羶味,店員即刻畀一張可享受最多冷氣o既枱畀我o地,真係好窩心.

由於一早已知有咩要叫,所以男友先叫o左下列食品,特別同店員講要唔辣o既.

1. RMB2.00一串o既韭菜串燒X2
冇諗過連韭菜都可以串住o黎燒,咁都被佢o地諗到.燒得唔會過火,唔太燶,食落,本身都有啲辣同有羊羶味,不過韭菜有渣,幾難o趙.
味道: 3分

2. RMB4.00.一串o既茄子
茄子唔係串燒,其實冇問題,呢個面上面落o左好多蒜茸,蓋過茄子o既味道,不過仍保留水份,唔太乾,唔錯.
男友話上次同老闆食時,茄子皮燒燶o左冇食,但今次唔燶,所以我o地成隻食晒.
味道: 3分

3. RMB2.00一串o既燒饅頭
其實我o地叫兩串o既,不過只識國語o既男店員可能冇為意,不過是但啦,反正我o地都唔應該一開始就樣樣都叫兩個.
一串係一個開邊饅頭,呢個可謂中式多士lu o掛.食落,同樣外面係脆卜卜,而饅頭o既口感同方包唔同,呢個雖然唔塗牛油,亦冇加調味料,但出奇地好食.真係要必試.
味道: 4.8分

4. RMB2.50一串o既羊肉X2
本身係羊再加羶辣味,都冇咩問題,口感係同樣燒得唔乾,o岩o岩好.
味道: 3.8分

5. RMB2.50一串o既雞腎X2
羶辣味o係晒外邊,雞腎明顯冇醃過,但仍燒得爽口o既.
味道: 3分

由於太熱,我o地叫o左一人一罐RMB5.00 o既可樂,但唔夠凍,解唔到渴,所以都叫o左一支啤酒,賣啤酒o個位識聽同講廣東話,我話要支凍o既,佢先畀我摸個樽身,夠凍至開,唔錯.

呢支原來係青島純生,味道好淡,比細個時爸爸用雪碧溝啤酒畀我o地飲更淡.

我o地一路食,一路睇menu,睇有冇特色o野食,就加料:

6. RMB10.00o既大豐收
男友之前提過係咩o黎,今次我o地都試吓.佢係一大碟幾種蔬菜,自己用腐皮包好,塗啲醬o黎食.蔬菜全部都係生o既,有唐生菜,青瓜,京蔥同青椒.佢o既肉醬味道都幾濃同鹹,但幾惹味,而蔬菜都幾新鮮.但要注意,青椒係勁辣,唔食得辣o既就真係唔好夾o黎食.
味道: 4分

下面呢啲係男友之前冇發現過.

7. RMB10.00三隻o既炭烤生蠔
面上都落o左好多蒜茸同[蔥花,生蠔唔係好大隻,但RMB10.00三隻,重要咩要求?食落,生蠔新鮮,同樣燒得o岩o岩好,唔乾.
味道:4分

8. RMB4.00一串(半條)o既秋刀魚
試吓咁樣食秋刀魚先,由於想留肚食多啲唔同種類o既o野,所以只叫一串.
呢個同樣係羶辣,古人用’魚’加’羊’砌成’鮮’字,尋晚終於試到.不過,都唔係咁鮮,可能應該將羊肉加魚肉一齊食至食到.但總觀o黎講,羶辣秋刀魚都幾有特色.
味道: 3分

9. RMB4.00一串四個o既蠶蛹
從未食過蠶蛹,見呢o度有,就膽粗粗試吓.o黎到後,個樣真係好肉酸,但,唔叫都叫o左咯,試啦.外面燒到脆卜卜,好香口,內裡飽滿o既蛋白質,口感似食薯蓉,味道係冇咩味.
味道: 3分

10. RMB8.00一串一隻o既鵪鶉X2
鵪鶉size比想像中大,同男友一人一隻,男友勁讚好味,好滿足.不過佢o既羶辣亦只係o係表面,有乜醃過.但都OK o既.
味道: 3分

11. RMB15.00o既拔絲地瓜
佢o地重有拔絲白果同香蕉,落單時我話要拔絲香蕉,但啤酒女郎話香蕉會漏,介紹我o地食地瓜.啊,咁好啦.
o黎到喇,我開頭以為得幾件,估唔到咁大碟.地瓜切薄片我趁熱先夾起浸凍水o黎食,外面o既冰糖夠脆喇,地瓜同樣夠腍亦熱,唔算太甜,好味.
味道: 4.8分

呢餐同男友食得幾滿足,因為唔使去到太遠,都食到咁有特色o既o野,而且唔係貴,份量唔太多,就可以滿足到人少但想試多種食物o既願望.

其實大部份串燒都有羊羶同辣味,而且都幾濃郁,應該係呢個地方菜o既特色.

環境:
地下室內有兩部分體式冷氣機,但都係冇雪種,由開頭坐低至食完走,都係汗流浹背.

衛生:
感覺唔太差,只係有一隻烏蠅飛o黎飛去,好煩.

小趣事:
店舖養有一隻小貓,佢可愛到走入o黎喵一聲叫人,重會做出嗲人o既表情,見客人有o野食,就好大膽咁雙腳爬上客人張椅,向客人討食.食o左o岩心水o既o野後,就唔會啋你.

咁當然,老闆娘會見到會捉翻佢出去.

其他:
呢o度重有湯,麵,飯,餃子,小炒同韓燒,唔接受羶辣串燒o既朋友,亦可以選擇呢啲o野食.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================