尋日(9-6-2009 Tue)請半日假連同男友陪爸爸上大陸搵親戚,點知佢出o左去,約我o地6:00pm去佢屋企,呢個時間只係2:35pm左右,咁去邊呢?唯有帶爸爸上地王大廈觀光,但天色唔好,於是到鍾菜食下午茶吧.
o黎到,都唔係好多人,今次係坐另一邊四人卡位,座位依然闊落舒適,侍應先問要咩價錢o既茶,我o地揀o左每位$12.00o既普洱,然後點o左:
1.青瓜伴海蜇
呢個份量都唔少,青瓜夠爽同鮮甜,海蜇亦都係爽,雖然佢係涼菜,但仍然好辣,我同爸爸食o左啲就食唔到,由我男友清埋.
2.法式焦糖燉蛋
呢個好細個,面上薄薄o既焦糖唔多,好脆唔太甜,而燉蛋夠滑,不過唔甜,食一半就畀男友食,要留肚試其他o野嘛.
3.蘿蔔千絲酥
size比正常o既細,外面脆,內裡o既蘿蔔絲仍好濕潤,不過蘿蔔味淡都食唔出.
4.咖啡曲奇
一碟四件,好細件,外型其實係用唧忌廉o既袋,兩個約2厘米長o既漿焗好後,再加上少少o既焦糖,將件黐埋一齊就成為一件.
講返味道,咖啡味係淡淡唔甜帶微苦,但唔鬆脆,甚至有少少粘口,呢個比較遜色.
由於以上比較o岩爸爸食o既只有蘿蔔千絲酥,所以佢忍唔住,要叫個雞仔餅食,而男友又順便叫個唔知咩鮑魚糕.
5.雞仔餅
一碟6件,好薄,薄到最多有3mm厚,而圓面同一個五蚊銀差唔多大.我又試吓先,咬落幾硬,幾乎可以咬崩牙,但好香,內裡仍有肥豬肉,味道同一般雞仔餅冇分別,不過佢薄同細件,就唔覺得太漏,一向唔鍾意食雞仔餅o既我好接受呢款.
6. 唔知咩鮑魚糕
一碟三件心形類似果凍o既糕點,包住一隻細細隻白色原隻鮑魚,賣相討好.我o地研究係咪真鮑魚,男友反轉睇,唔似,因有鮑魚o既紋理,食落,鮑魚冇乜味,但凍糕有好濃o既鮑魚味,應該係用o左鮑魚餚湯.
所有食物,除涼食外,都係熱辣辣.
其他:
雖然我o地揀o既係最平o個種普洱,但都唔算太差,而且佢一壺比一壺濃.
服務:
我o地揀呢款普洱,個壺係好細個o既玻璃壺,一壺都只可斟三杯,侍應都密密為我o地添茶,唔錯.
呢餐埋單都係RMB112.00
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
