今朝(23-4-2009 Thur)同男友食早餐,食厭晒以往食過o個幾間,而且成日行過呢o度至記得o黎呢條街食早餐,今日終於記得喇,o黎到呢條街睇吓,決定翠華啦.

我同男友都揀$24.00o既早餐,佢要B餐沙爹牛肉公仔麵,炒蛋,牛油豬仔,飲熱檸蜜.既然佢o既已經有大家都想試o既牛油豬仔,咁我要A餐鮑魚火腿絲通粉,牛油方包,煎雙蛋同熱奶茶啦.

不久,兩杯飲品先到,我先加糖飲我o既奶茶,茶味都夠.,可以接受.之後就食早餐喇,通粉o既鮑魚絲唔多,我食啲通粉先,真係有鮑魚味喎,我叫我男友試,可惜佢已食o左沙爹牛肉,食唔出有鮑魚味lu.,之後我食鮑魚絲,亦都有鮑魚味.而火腿通粉都不過不失,粉量都OK多.

我又試o左男友一件沙爹牛肉,都幾香幾腍.

而我o既煎雙蛋,蛋黃巨型,牛油方包內有好多牛油,唔似好多間咁,只揩一吓咁多,但食到我好漏,要男友食半件.

最後試佢半個牛油豬仔,真係焗到好脆,牛油份量少啲,但恰到好處,不過唔會加$7.00食多個囉.

而我又留細半份通粉男友食,為今日晏晝又要食飯盒留肚.

環境:
枱下面有個拉櫃仔放餐刀,都係一個幾好o既設計.
裝修真係唔似一般茶餐廳,好落本,但花哩花碌,但好光猛,不過唔知係咪冷氣唔夠,食完覺得熱熱地.

其他:
男友畀錢後問我點解會收$50.00?我奇怪,明明兩個餐都係$24.00,加一都唔呢個數啦.我問男友,張單寫幾錢?佢答係符號o黎,咁我o地返轉頭問收銀,佢答熱檸蜜加$2.00.啊.點解唔o係餐牌o度寫明,落單時又唔提我o地?咁會製造誤會o架嘛.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================