** 此 食 肆 的 第 四 個 OK **

尋晚(13-8-2008 Wed)同女友人EL o黎個一年一度o既晚飯.佢朋友之前o黎過,話覺得唔差,所以我o地就揀呢o度.

我o地接近7點去到,時間尚早,店內一個客人都冇,侍應安排我o地到鐵板枱坐,好開心啊,從未試過坐鐵板枱o架.

我o地見啲一人餐又平又多o野食,於是揀兩個o黎share,就係:$8X.00o既煎三文魚扒同$13X.00o既安格斯牛.

我飲凍柚子蜜,EL要凍檸樂.好奇怪,佢o地冇畀匙我去攪勻黐晒o係杯底o既柚子蜜,要叫至畀.

好,order完好快就有前菜食.
1. 三色刺身
有甜蝦,北寄貝各兩件,一件三文魚.
2. 鴨胸薯仔沙律
呢兩樣賣相精緻,味道就冇咩特別,亦冇乜問題.

3.炒什菜
呢碟唔係o係我o地面前炒,到最後我o地食完o野齋睇師傅表演時,見到佢炒什菜,我至同EL講點解我o地o個碟唔係o係我o地面前炒?佢答o係隔離枱炒拎過o黎.
大大碟o既什菜,有少量芽菜,金菇同大量椰菜,不過覺得太淡,冇乜味.

4.麵豉湯
有好多料,有豆腐,海帶同蘿蔔.可惜又係過淡之餘,海帶未腍,豆腐同蘿蔔都冇咩味.

除o左炒什菜外,其他o既都係由資深啲o既型仔師傅主理.
5.煎三文魚扒
伴以洋蔥,青瓜同蕃茄,師傅擺落o黎時畀埋一碟醬汁,提我o地話係點呢隻食.
唔,雖然有落黑椒,不過都唔覺有味,三文魚亦係OK.

6. 安格斯牛
脂肪部份集中o係中間,我自己就覺得肥,唔係好鍾意呢個部位,不過燒得o岩o岩好,唔太熟.不過好似冇咩牛味喎.

7.鰻魚炒烏冬
加o左燒汁o既炒烏冬,亦都係一般,不過味道係有返,冇其他o個啲咁淡而無味.

8.章魚燒餅
眼見師傅煎一件蛋餅,然後將章魚燒餅放上面,咁就可以黐住,然後反轉加沙律醬,燒汁同木魚即成.
食落,好漏,係件燒餅有太多粉喇,而且都係冇乜味.

最後叫甜品,有櫻花雪糕,我o地梗係唔放過呢個機會,食櫻花雪糕啦.啊,味道有少少似淡紅豆雪糕味,內裡有啲小葉片,食得出有味道,有啲似臭草味.

總括o黎講,呢o度o野食味道真係偏淡,不過咁平就食到飽同睇到師傅整,都OK o既.

不過其實可以唔使燒得咁快手,我o地根本食唔切,攤凍o左唔係幾好.

小插曲:
最初o個個型資深師傅整完我o地o既o野食後,佢就返入去’廚房’,佢隔離後生靚仔資歷應該低小小o既師傅仔,走o左o黎我o地面前整其他客人o既o野食.咁我o地就可以繼續睇表演.而當佢放火燒安格斯牛時,我就把握時機影相(因之前我錯過o左),佢亦都好識做咁等我.

服務:
其實最主要serve我o地o既就係個師傅,因為佢燒完o野上碟後,就係佢直接交畀我o地,而俄應都只係幫我o地執o野.

最後我o地主動叫甜品後,一個應該係高級啲o既侍應走o黎提我o地有甜品,我答佢叫o左.但等o左幾耐吓(當時全店只有14個客人,3個侍應)唔明點解可以咁耐都未到,於是問開頭o個個女侍應(我估佢唔記得o左),佢話’o畢’o緊.講完就即到,咁根本就係佢唔記得.

然後我同高級o既侍應講埋單,佢當時係落o緊我隔離位o既order,等o左陣,佢走埋o黎同我o地唔好意思,佢唔記得我o地要埋單.(咁至係o架嘛,唔記得就係唔記得,咁我都唔怪佢,因為佢真係忙.)

環境:
雖然坐鐵板枱對著煮o野食o既鐵板,但一啲都煙唔到我o地,座位亦舒適,唔錯.

埋單總數:$237.00

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================