尋晚(9-11-2007 Fri)約o左女友人CL,男友人EC同O再來一次飯局,今次由O做東,8:00pm到尖沙咀,O叫我o地到寶勒巷金悅海鮮酒家,我o地到來有卡位,不過我o地由一入去到卡位坐低後,都有陣酸縮味,且唔想打邊爐,於是即拉大隊轉場.
由CL帶我o地o黎’韓國街’睇睇莊園韓國料理有冇位,o黎到,噢!都幾多人等,因為唔想等,唯有到幾個舖位之隔o既呢間,冇人等,且即有最入面o既一張卡位.
呢o度食物價錢真係偏貴,我o地叫o左個$400.00 o既2-3人燒烤餐,揀o左牛肋骨,青衣魚柳,豆腐湯同炒木薯粉絲,只包三罐飲品.
先o黎多碟前菜同生菜,前菜有多種,當然包括泡菜,但我冇試呢個,因為明知辣,而且o係韓國都已經食過.但黑豆味道好吃,甜甜地o既,被我一人掃晒.
不久,先o黎牛肋骨,牛肋骨只有兩件,侍應替我o地放o係爐上並攤開,原來係差唔多有一尺長o既牛肉,燒好後,自己用利剪剪,唔……覺得OK啊.
之後到青衣魚柳,只有八件,燒好進食後,覺得一般,唔好食又唔難食.
紅紅o既豆腐湯到o左,內裡都有連殼o既蜆,同上次一樣,除CL外,我o地三人都唔食得辣,不過都試小小,豆腐OK滑,試小小湯,覺得已經算辣,唔可以多飲,不過覺得辣o既豆腐幾得意,感覺同麻婆豆腐o既唔同.
最後,炒木薯粉絲都到o黎,透明o既粉絲直徑約有1.5mm,配有黑木耳,少量菜,肥豬肉絲加有洋蔥,炒得唔太乾,仍帶濕並好易夾起的,食落味道都OK,粉絲糊口的,呢碟係全場最好o既.
而由所有食物份量都唔係多,於是O加碼,叫多個雞肉.我覺得雞肉麻麻,冇咩味.
四人卡位坐得舒服,不過枱唔夠大囉.
朋友由後門出去搵廁所,返o黎話呢都幾危險,係好迂迴曲折咁搵到,而且o係後巷,奉勸各位盡量唔好用或搵多位朋友陪同.
唔清楚埋單幾錢,照估計應該要$500.00.CL話好掛住莊園,下次要book定先.
吃罷我o地就一齊去飲o野lu.
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
