尋晚(21-9-2007 Fri)舊女同事M請我食o既生日飯,大約7點到o黎,冇咩人,我o地坐o係最入面最貼整o野食o個張兩人枱,我o地叫o左:
1.招牌蟹子肉鬆沙律(細)
M同我都好掛念呢個招牌菜,其實一直都知佢從最初抵食夾大件到成名後,size好快就縮水,不過呢樣真係幾好食,所以要叫.
有幾片生菜墊底,幼幼o既青瓜絲上舖有肉鬆同蟹子,份量小o左好多,食落,蟹子有啲腥,不過我o地唔介意,因為咁即係話呢啲係真蟹子,唔係假o野.青瓜絲依然夠清甜,配上肉鬆同蟹子,口感係一流.
M察覺到幾乎每枱客都叫呢個沙律.
4.碗仔刺,列明有兩隻甜蝦,四片墨魚,四片帶子,四片北寄貝,四片三文魚
一直欣賞呢個名改得幾好,但尋晚第一次食.所有刺身整整齊齊咁排列o係蘿蔔絲同冰上.
刺身尚可,但略嫌北寄貝同墨魚切得太薄,墨魚更切成條狀,且有根.但三文魚則較厚及比較大件.
2.炭燒雞串及3.炭燒燒汁豬頸肉
上面淋有同樣o既燒汁,幾杰幾濃,食落,好似食唔到雞味,豬頸肉份量唔小.味道都係一般.我略嫌燒汁鹹o左啲.
5.汁燒牛肉拉麵
牛肉似係打邊爐o既肥牛,麵身夠淰,味道都OK.份量亦唔細.我o地成晚都要你推我讓,因為真係幾飽.
埋單$197.00
從開張冇耐(應該係三年前)到o衣o家,都幫襯過幾次,但尋晚一入去,冇o左年輕女侍應,格局冇變,但牆身好似唔同o左色,以往o既大餐牌冇o左,而且菜色唔同o左,覺得可能係轉o左老闆.
環境:
依然係咁迫夾.
服務:
得兩個女侍應,加上由7:30pm左右到我o地10:30pm走都坐無虛席,佢o地根本做唔切,所以都要叫佢o地斟茶,但之後佢o地都有盡量主動斟.
衛生:
枱上兩張細餐牌有啲黐立立o既感覺,而中途年輕一啲o既女侍應收o野入內時都跣一跣腳,幸好佢手上唔係攞住熱o野同扶得切我o既椅背,否則佢同我都會受傷.
註:走o既時候見有兩張枱食蜆,有好多蜆殼,唔知係咪好好食同好抵食呢?
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
