繼續接待老闆下集(12-6-2007晚餐)
夜晚(嚴格o黎講唔算係夜晚,因為只係6:15pm)同5個日本人o黎呢o度食飯,由於我自己遲少少到,所以另一個老闆已經點好菜,唔知佢有冇叫小籠包呢?不久,餸菜o黎喇,
1. 先o黎海蜇,醉雞,OK啦.
2. 然後係片皮鴨,睇落色水好似唔係好夠,食落,皮唔脆o既?唉!
3. 到應該係魚翅竹笙湯,都係一般啦.
4. 一個年資應該比較大o既女侍應見枱面冇咩位,於是問幫我o地分o左啲小籠包好嗎?我一口答應.好懷念4年前同個日本客o黎到同一張枱食熱騰騰,多汁o既小籠包.o黎喇o黎喇,不過好失望,1.點解大隻o左o既?2.頂上o既皮乾o左.見一個日本客食,我重想提醒佢小心裡面啲汁熱,哈,佢識得點食小籠包,而睇佢食落,應該係唔熱.好,到我食喇,果然係唔熱兼且冇咩汁,只有大大舊o既肉,有冇攪錯啊?公仔雪藏即食o既小籠包味道都好食過佢,而且重要差過o係日本食o既翻版小籠包添,好失望呀!
5. 之後我唔知咩名堂o既炸蝦,眼見有辣椒o係底,心諗,死梗,辣o既.不過盡管試吓,夾面唔點汁咪得囉,咬落,咦,甜o既?蝦又好大隻,都夠爽,粉團又唔厚,呢個餸可以o既.
6.最後又係一個我唔知咩名堂o既菜,應該係上湯浸青瓜o掛,都係冇咩特別囉.
一個小插曲:其中一個本著大無畏精神o既客人貪食,夾墊o係第5個菜底o既辣椒,最初佢食長,新鮮o既紅辣椒食,佢話唔辣,於是試半粒少於一個一毫硬幣o既乾紅辣椒o黎食,直覺覺得係好辣o既指天椒但唔確定,於是冇阻止佢.果然,最初佢話冇o野,食完後佢就噴火喇,因為佢食到裡面o既核.眼見佢痛苦難當,重飲加飯酒o黎'解辣',於是叫年輕侍應畀杯凍水佢,個侍應問我係咪蒸餾水?我反問佢係咪一定要蒸餾水,佢答我都唔係o既,一係滾水加冰,我答係啦係啦.心諗如果我唔係香港人,識反問個侍應,咪畀佢屈o左杯蒸餾水?
服務方面:
多o左好多年輕侍應,佢o地成日要人教,其中一個例子係加飯酒要熱飲o既,年資大啲o既女侍應要教佢o地不時留意用o黎坐熱o既水瓶內o既水夠唔夠熱.呢位女侍應真係好盡責.不過整體服務都可以o既,碟都換得好快.
環境方面:
唔明點解我o地book o左枱而且6點就o黎到,都係畀張好似臨時加開o既枱我o地囉,眼見重有好多咭枱.而且呢張枱成日有隻小昆蟲飛o黎飛去,好煩.
價錢我就唔知喇,不過應該唔平.
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
