尋晚我同朋友都試o左下面Fabulous Jay介紹o既套餐加一客36蚊石燒蘋果無骨雞翼,我o地各自飲32蚊o既紅粉佳人同....哎呀,唔記得咩名o既酒精飲品.我朋友唔飲酒o既,但佢生日兼且被我挑起佢有興趣試紅粉佳人,紅粉佳人係有氈酒同士多啤梨製成,但我同佢講氈酒好難入口,不過佢飲o左話幾易入口,OK.我o個杯係蜜瓜,蜜瓜奶同酒調成o既,飲落唔覺有酒味,似飲凍蜜瓜奶,可能啲飲品唔加太多酒o掛.
講返食,
大致上同意Fabulous Jay對呢個餐o既評語,不過加少少自己o既意見.
1.南越蒸粉卷:
跟酸甜醬上,好味.而手多多,貪新鮮o既我,o係第二件加魚露食,結果係唔夾o既.
2.雞絲柚子野菜沙律:
柚子唔太澀,o岩o岩好.不過真係食到個底好鹹,而雞絲好似少o左啲.
3.香葉石燒雞肉:
真係好清,我同我朋友都覺得清得滯冇味,點少少魚露食就好味啲.(不過我諗餐廳呢個做法幾好,可以照顧到唔同人o既口味,因為整鹹o左冇得救,淡啲可以自己加味)不過都幾大碟.
4.牛油忌廉紅什菜:
哈,我o地有老人癡呆症,諗極都諗唔返呢個係咩名堂,真係多謝Fabulous Jay咁詳細o既食評.亦因為咁,我o地食呢個菜o既時侯都唔知食梗乜,只覺得陣味好熟悉,不過什菜裡面有冬菇,覺得同啲汁唔夾,但都可以食o既.
5.欖菜肉鬆紅米飯:
其中一個令我o地叫呢個餐o既原因係,我o地未食過紅米飯.
佢o地係用碗上o既,而且係兩大碗,真係好滿,不過欖菜肉鬆唔係好多,又係孤寒o左啲.原來紅米都係冇咩特別
6.自己另叫o既石燒蘋果無骨雞翼:
因為被個名吸引o左,所以試吓.佢係連一個石爐上,一客3隻(心諗:唔該唔好咁孤寒,好心兩個人就畀四隻啦)每隻雞翼只係有半斷中翼至翼尖,因為要釀蘋果入去嘛,面灑o左少少應該係七味粉o既o野,幸好只係有少少辣,唔食得辣o既我都接受到.不過,咬落去只搵到一粒大概只有1-1.5cm立方體大o既蘋果粒,實在太細少囉.諗返,36蚊一客,即12蚊一隻都幾貴同唔抵.唯一就係佢熱騰騰囉.
服務:
由於我o地好早就入座,才6點45分左右,有好多位,因為天氣唔係太熱,出出面應該唔會大汗叠細汗,而且朋友話想傾偈,於是我o地揀o左出面坐,開頭係坐細細張o既二人枱,當我o地order o左呢個二人套餐後,個waitress就主動幫我o地轉張大啲三人枱,因為個餐有好多o野(唔知佢o地係咪有上呢個網睇啲食客有咩飯後感而作出改善呢?)
環境:
轉枱時,行到o個張枱咁o岩被我見到有隻上手留下o既雞翼尖o係地下,呢點就有啲大煞風景囉.不過我o地坐呢張枱都覺得舒服,原來出面有吊扇,而且有啲微風,所以覺得環境都唔錯o既.
而離開時見到裡面o既位應該都幾闊落,唔係太迫咁.
呢餐飯連加一係$272.80,可能係貴o左少少,不過都可以接受o既.
總括o黎講,呢o度各樣o野都OK o既.
PS:原來我o地尋日同啲雞有仇,食o左全雞宴. ^.^"
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
