最近一兩個星期，身邊朋友在面書經常都會提到食韓國燒烤，又見到老媽不停在煲韓劇，突然好有衝動食韓國菜，加上食友S兄一張極迷人嘅泡菜相，種種原因令我要回到韓松，用相片紀錄一下韓國真正風味。
韓松位於柯士甸道同柯士甸路交界，較年長嘅朋友或者會記得多年之前有間出名餐廳叫九州市場，正係同一個舖位，好易就搵到。進入餐廳內，韓國籍老闆用唔鹹唔淡嘅廣東話就主動招呼你，而入面好多位侍應都係韓國人，如果言語溝通上有麻煩的話，都有中國人侍應可以幫到你手。
![]( "250411-01")
|
| 開始韓國真正風味之旅~ |
![]( "250411-02")
|
| 裝修格局雖然簡樸，但感覺都幾舒適 |
今次到韓松想食點較傳統風味，於是選叫左兩樣其他韓式餐廳較少有得食嘅部隊火鍋同炸醬麵，另外點選左味道較溫和嘅海鮮蔥花餅。至於燒烤，一場黎到點都會食少少，於是叫左一客薄切五花腩。點菜後為餐廳拍照後，令人期待嘅前菜終於來了...
![]( "250411-03")
|
| 前菜款式極啱我口味 |
![]( "250411-04")
|
| 可能係全港最正宗味道的泡菜！ |
八碟前菜款款都吸引，而前菜質素比起名家做得更好，單係甜薯酸蘿蔔絲同埋泡菜，已好食到可以送兩碗白飯。值得一提係呢度嘅泡菜，自家出品，咬落夠辣夠酸，而且亦感覺到菜本身嘅鮮甜，食到停唔到口，呢度嘅泡菜係我食過香港咁多間韓國餐廳做得最好的，值得推介！
![]( "250411-05")
|
| 一卷卷嘅五花腩賣相吸引 |
由於火鍋跟燒肉都要用上同一個爐頭，店方先安排我地食薄切五花腩($98)，一卷卷嘅五花腩賣相吸引，由於肉片係薄切關係，所以攤放在鐵板上好快就已經煎熟。瘦肉一層約四分一吋，跟一層薄薄嘅肥肉，再連軟骨的瘦肉，蘸上醬汁，肉質鬆軟好味，絕不比燒牛肉遜色。
![]( "250411-06")
|
| 中意煲韓劇嘅朋友唔會感到陌生吧～ |
![]( "250411-07")
|
| 炸醬麵出奇地惹味，洋蔥應記一功 |
如果睇韓劇睇到入晒腦嘅朋友，應該會對炸醬麵有所認識。韓式炸醬麵賣相雖然都幾核突，但食落甜甜地幾好味，做法係以韓國黑醬混入碎豬肉，薯仔同埋已炒香洋蔥，淋上彈牙嘅麵條，上面再加上青瓜絲，食果陣將所有野攪勻就可以。坦白講，韓式炸醬麵我平時甚少會選叫，韓松做得夠唔夠正宗，我亦唔多加評論，但味道最重要，呢碗炸醬麵($80)最後食到渣都無埋，咁你話好唔好食呢？
![]( "250411-08")
|
| 海鮮蔥花餅名不乎實，但味道還可以... |
海鮮蔥花餅($108)外層微脆有如意式薄餅一樣，但用韓國麵粉做出黎，就多左一份香軟口感。不過海鮮配料就令人非常失望，只有幾隻小蝦同魷魚仔，我下次寧願只食泡菜餅好過。
![]( "250411-09")
|
| 呢個唔係G.I. Joe，係G.I. HotPot部隊火鍋！ |
![]( "250411-10")
|
| 唔夠麵可以再追加，混入白飯一樣好味 |
食過炸醬麵後，另一款地道菜式部隊火鍋($260/細)隨即送上，餐牌上見到部隊火鍋英文譯名為"G.I. HotPot"，令人會想起G.I.Joe，事實上部隊火鍋起源來自當年南韓打仗，物資缺乏，韓軍將美援物資入面嘅火腿同香腸，放晒入泡菜鍋入面煮，竟然發現係咁好味，流傳之下成為今日韓國民間一種美食。或者大家會覺得部隊火鍋用料平凡，跟本唔值呢個價錢，但入面嘅韓松自家泡菜，秀珍菰，香腸樣樣都咁好味，再加埋即食麵一齊泡煮，既飽肚又滿足，又有韓國風味，抵返晒啦！
![]( "250411-11")
|
| 韓國啤酒有如生力一樣，味淡但有當地風味 |
如果大家中意食韓國菜的話，韓松係一間唔可以唔去嘅正宗食店，而且食品款式眾多，豐儉由人，無論一支公定係一大班人黎到，包保你可以滿足離開！題外話，原來呢度嘅自家泡菜係可以外賣拎走，中意入廚嘅朋友可以買返份吧！
韓松韓國料理
尖沙咀柯士甸道144號祥景樓地舖B-C及1樓A-B室
============================================
感謝 kent1012 提供以上資料
kent1012http://www.kentxfood.com/
============================================
