文化氣色中的休閒國度

假期想到一個環境舒適嘅地方食個午餐，突然想起食友S推介過嘅意大利餐廳，毫不考慮之下就去到灣仔香港藝術中心，希望可以一邊欣賞維港景色，一邊享用美味嘅意大利菜。


開放式廚房傳來陣陣薄餅香味



陽光射到木地板上，感覺懶洋洋～


對於我呢類欠缺文化氣色嘅人黎講，香港藝術中心落成以黎只去過不足十次，而且更加無諗過在六樓竟然有如此出色嘅意大利餐廳。踏出電梯，眼前係一間全以深色木為主調嘅悠閒風格食店，左邊係開放式廚房，右邊有一排盡覽維港玻璃窗，陽光經玻璃窗透射到木地板，極有懶洋洋嘅感覺，非常舒適，令我第一眼就愛上了。
由於大部份座位已訂，店員亦只能安排我地坐於玻璃窗前吧檯位，呢個座位可以睇哂成個海景，鄰近嘅會展中心跟彼岸嘅環球貿易廣場，同樣盡收眼簾，相比起餐廳內四人方檯似乎更合我心意。


自選頭盤吧款式唔少，加$30抵食



自選頭盤夠你滿足～


是日午餐款式有五款，由$79-$128不等，同樣跟餐湯，甜品或咖啡。如果唔想要餐湯的話，可以另加$30要自選頭盤吧。點菜前店員建議先到餐廳內堂嘅頭盤吧睇下才作決定，頭盤選擇不少，比起好多酒店自助餐款式仲要多，其中有一樣頭盤極吸引我目光，所以毫不猶豫就決定多付少少錢，到底係乜野咁吸引，先同大家賣個關子...


麵包籃整體可以再好一點


每次食意大利餐，麵包籃對我來講係一個極重要嘅評分部份，呢度以小鐵筒盛載三款麵包，分別有香草包，小法包及麵包條。侍應為我地準備黑醋及橄欖油後，我亦唔客氣逐款品嚐，麵包條及香草包香氣撲鼻，但食落質素只屬一般，反而外表平平無奇嘅小法包鬆軟好味。不過我略嫌黑醋酸度不足，而且我亦留意侍應為客人倒橄欖油份量比黑醋多，希望店方可以日後作改善。


這個清湯好飲到不得了！


是日餐湯有雞肝意麵清湯及蕃茄蓉湯兩款，由於知道前者雖要較多烹調技巧先至做得好，所以決定點選。經負責人Shirley解釋，佢地煮湯工序跟足意大利傳統方法，煮湯時不停攪動，煲滾後要加入蛋白隔渣，當蛋白凝固時會連帶著湯渣，清走後再加入蛋白，重覆多次過濾之後先做成清湯。呢份清湯味道清甜帶點雞肉味，而雞肝咬落粉嫩豐腴，非常精彩，可惜餐湯應該每日都會轉款，大家飲唔飲到真係要講下緣份了...


水牛芝士配合鮮甜蕃茄，天造地設！



自行加上橄欖油，黑醋同黑胡椒粒...正！


剛才提及有款頭盤令我雙眼發光，正是蕃茄伴Buffalo Mozzarella。雖然水牛芝士唔算係頂級芝士品種，但身價亦非一般牛奶芝士級別，能夠任食絕對係一種幸福。我先夾左兩塊厚厚嘅Mozzarella，返回座位後再自行加上橄欖油及黑醋，再灑上黑胡椒粒，水牛芝士獨有奶香剎那間散發出黎，軟軟嘅口感配合鮮甜蕃茄片，絕對係天造地設嘅一對，味蕾十分滿足！本想要杯House Wine與水牛芝士作伴，可惜店方抱歉地表示餐廳開業僅二十日，酒牌仍然未申請到。不過我相信呢度有酒牌後，會成為不少人嘆酒談心，欣賞夜景嘅浪漫熱點。


燒牛肉質素只屬平庸


兩份套餐主菜分別要燒牛肉同埋吞拿魚白酒螺絲粉，燒牛肉肉身約半吋厚，淋上濃稠嘅蘑菰汁本以為選擇正確，可惜燒肉質素只屬平庸，肉質唔太嫩滑，加上蘑菰汁味道偏鹹，以$128最頂尖嘅套餐價錢來講，令人失望，下次到來決不會再選紅肉作主菜。


吞拿魚白酒螺絲粉水準不俗



Al Dente！

另一邊廂嘅吞拿魚白酒螺絲粉香味十足，橄欖油跟白酒配合得天衣無縫，螺絲粉食落夠Al Dente，配上微量香草，就算整碟食晒亦唔會覺得膩滯，水準唔錯。此時見到另一檯客人點選紅花雅枝竹意大利飯，賣相吸引，下次到來知道應該如何在眾多主菜中作選擇了！


熱咖啡作終結


餐後本想點選甜品作終結，但食左幾塊Mozzarella後胃納已到極限，最後選叫一杯熱咖啡。咖啡味道無咩太大驚喜，但果份香氣總會令人留戀於此。Assaggio無論在價錢，食物質素，服務環境方面，我都給予極高評價，希望呢間餐廳可以為灣仔區帶來另一番新氣象。


Assaggio Trattoria Italiana
灣仔港灣道2號香港藝術中心6樓

============================================

感謝 kent1012 提供以上資料

kent1012http://www.kentxfood.com/

============================================