我到大坑搵食慣性都係由天后果邊行入去，而每次到浣紗街附近，都總會經過達磨而過門不入，始終我都係一個怕排隊嘅人，所以一直跟呢間小店未有食緣。不過心諗達磨始終都係港島拉麵三雄之一，點都要搵機會拜會一下，心血來潮下決定在店子中午開門前到達，希望一試呢間星級拉麵店嘅風采...
![]( "130411-01")
|
| 日本店子總會有一個放响當眼位 |
到達時距離營業時間仲有五分鐘，店方仍然未開門派籌，我從玻璃門窺看一下店內環境，地方相當狹窄，而整間店子只可以容納約十數人，當時門外只有四人排隊，睇黎我運氣唔錯，哈哈！
![]( "130411-02")
|
| 獨一無二既筷子座，有心思 |
等左約十分鐘，店員開始安排入座，由於在門外排隊時早已將餐牌睇過一次，所以已記下想要點選嘅食品編號，希望加快落單速度。二話不說，一坐低就即叫一個R3一個R5，再來一個F2，如此有效率嘅點菜方式，相信大家在澳牛都一定試過吧！
![]( "130411-03")
|
| 一品豚骨醬油拉麵賣相豐富討好 |
先送上來嘅係R3達磨一品豚骨醬油拉麵($85)，說份量，比起MIST跟豚王明顯較少，實際跟秀拉麵差唔多大碗，男士只叫一碗拉麵應該無法滿足。份量縱使較少，不過賣相卻豐富討好，湯麵上嘅紅椒絲黑木耳同明太子等只係配角，無法掩飾拉麵本身嘅光芒。
![]( "130411-04")
|
| 叉燒軟腍但較薄，水準不過不失 |
![]( "130411-05")
|
| 豚角煮肉質豐腴，非常精彩 |
先飲一口醬油湯頭，湯底略帶淡黃色，質感濃稠，湯底充斥一陣陣芝麻油香，甚有水準。麵條屬幼身，入口爽彈有嚼勁，可見煮麵功夫到家，不過麵條略欠應有香氣，跟MIST相比更加係完全輸掉。配料方面，碗內有切得薄薄嘅叉燒，肥瘦算均勻，咬落亦夠軟腍，質素來計算合格。反而幾塊豚角煮更得我心，脂肪部份雖然較多，但入口絕唔會感到油膩，入口豐腴之餘，亦不失嫩滑感覺，非常精彩。至於溏心蛋只係一般水準，而且蛋香欠奉，令人有點失望。
![]( "130411-06")
|
| 豚骨湯底不及醬油湯底優勝 |
![]( "130411-07")
|
| 麵條幼細彈牙，但跟MIST仍然相差很遠... |
![]( "130411-08")
|
| 辣醬另上，細心周到 |
另一碗R5達磨豚角煮豚骨辣味拉麵($75)在侍應提點下，先飲一口湯試辣度，再自行加辣醬調味。豚骨湯底質感明顯比起醬油更濃郁，膠質亦較豐富，但以豚骨湯來計又不及豚王般香濃鮮甜，而且亦較自家嘅醬油湯底失色，下次到來應該主打醬油湯麵。跟來嘅一小碟辣醬甚香，辣度剛好，加入拉麵中亦唔會令到豬骨湯味道失衡，算係一個意外小驚喜。
![]( "130411-09")
|
| 如果係淨雞翼，再收平少少就更好～ |
達磨餐牌上都有十多款小食供應，今次選叫嘅係F2菠菜釀雞翼($30/兩隻)。雞翼外皮燒得微脆，面層醬汁夠惹味，加上芝麻粒，香口好食。不過餡料菠菜乏味，釀入雞翼未能發揮其功效，更令呢份小食變得平平無奇...
終於完成日式拉麵港島三雄最後一章，可以鬆一口氣之餘，亦可以作一個總結。MIST麵質超班，服務一流，豚王湯底令讚不絕口，街頭風味無人能及，而達磨就勝在配料突出，價錢同款式較大眾化。三間麵店各有特色，而且定位唔同，只希望大家都可以繼續保持水準，俾香港人食到有日本風味嘅優質拉麵。
大家可以參考一下其他兩間人氣拉麵店食評：
豚王食評：真心入魂！熱血拉麵！
MIST食評：拉麵貴公子
達磨日式拉麵
大坑銅鑼灣道92號E地下
============================================
感謝 kent1012 提供以上資料
kent1012http://www.kentxfood.com/
============================================
