近日天氣寒風刺骨，最想飲個暖胃嘅湯，而胡椒豬肚湯更加係最理想選擇。在筲箕灣有間位置唔起眼小店鋒記小炒王，果度嘅名物胡椒豬肚雞煲實在好味到不得了，用料足味道好不特止，而且價錢都幾公道，所以實在諗唔到唔介紹俾大家嘅理由。
![]( "030111-01")
|
| 用料足，味道好，價錢公道 |
店子面積好細，如果你人數有返咁上下，建議你先訂位，2-4人的話walk-in都應該問題不大。小店位置就較為偏僻，筲箕灣道上東區醫院果條長命斜附近有間樂聲琴行，旁邊條小巷走入去就見到，由港鐵站A3出口行過去都唔駛十分鐘，所以大家唔駛太擔心唔就腳。如果中意食較為清淡的話，鋒記小炒王並唔太適合你，因為呢度主打各類煲仔菜，火鍋同埋惹味罪惡小菜，或者來個胡椒豬肚雞煲，再叫丸類菜蔬火鍋料就算吧～！哈哈
![]( "030111-02")
|
| 名物胡椒豬肚雞煲正到爆燈 |
![]( "030111-03")
|
| 用料豐富新鮮，大件夾抵食！ |
胡椒豬肚雞煲($140) - 名物果然係名不虛傳，奶白色嘅濃湯以豬骨、白胡椒、雞肉及雜菜久熬而成，加上原隻肥雞切件同豬肚，份量十足。湯面上難免有一層雞黃油，再加上厚厚嘅胡椒粉散在上面，所以未飲就知個湯頭必定非常精彩...影完相後人人都急不及待，先來一碗湯暖暖身。將胡椒粉混入熱湯中，香味四溢，鮮甜無比，湯由咽喉直至胃裡慢慢落下去，愈飲愈暖，感覺實在無得頂。睇返舊有網上文章，得悉老闆原來從深圳挑選白胡椒，炒香後再以原粒胡椒、胡椒碎及胡椒粉炮製湯底，怪不得咁惹味啦！當然嫩滑嘅鮮雞件同豬肚都好好味，兩人一窩的話，相信應該容不下其他小菜了...
![]( "030111-04")
|
| 椒鹽鮮魷香酥可口 |
喝過暖湯，喝一口冰凍啤酒，再食其他罪惡小菜，係一件快事！先來一客椒鹽鮮魷($55)，用上嘅雖然唔係大尾魷，但勝在廚師功夫到家，鮮魷外脆內嫩，香酥可口，佐酒絕對一流！
![]( "030111-05")
|
| 黃金蝦入味又唔油膩，讚！ |
黃金蝦($65)做法不算傳統正宗，但為方便大家進食，都係先剥殼較好。鹹蛋黃蓉整得夠乾身，跟爽脆彈牙嘅蝦肉緊緊黏上，炒得夠晒入味又唔油膩，味道自然係正啦！
![]( "030111-06")
|
| 至愛的XO醬爆豬肺 |
在菜單上見到有一個令我瞳孔放大，口水直流嘅小菜，決定不理其他人食唔食，就叫左呢個XO醬爆豬肺($60)。豬肺一直係我至愛，每次飲豬肺湯，所有湯渣必定一件不留。用XO醬爆自然係惹味至極，今次雖然略嫌火喉過左少少，但不失係一個送酒佳餚，下次必定要再食一次！
![]( "030111-07")
|
| 香煎蓮藕餅送飯唔錯 |
香煎蓮藕餅($55)份量幾多，藕餅煎得香脆，水準算合格。如果想要一味小菜送白飯的話，呢個係唔錯嘅選擇。
![]( "030111-08")
|
| 避風塘田雞乃敗北之作，希望下次有改善 |
避風塘田雞($65）只睇賣相本來都有一定期望，但食落真係較為失望，辣味不足之餘，火喉亦過左，田雞太乾又無味，希望下次有改善吧！
![]( "030111-09")
|
| 鯪魚係永遠的配角 |
大家都想食啲蔬菜溝淡一下，於是叫左平民極品豆豉鯪魚油麥菜。鯪魚係永遠的配角，豆豉加油麥菜才是呢味菜嘅靈魂，或者大家下廚可能做得更好味，不過呢度水準我覺得係絕對合格的！
今餐一行八人，連酒水埋單每位都係$80左右，絕對係豐富又抵食，尤其係果個胡椒豬肚雞煲，更加係令人回味無窮，近期天氣反覆無常，呼吸道很易患病，來飲個胡椒湯驅寒，病痛包保不治而癒。
鋒記小炒王
筲箕灣愛民街6至28號新利大廈地下3A舖
============================================
感謝 kent1012 提供以上資料
kent1012http://www.kentxfood.com/
============================================
