一向以來，我都覺得在遊客區做外國人生意嘅中菜餐館，永遠都係價錢貴，食物平凡，質素亦尤如外國唐人街餐館東施效顰一般，香港人食必定叫把鬼回水。不過蘇豪區附近有一間極有中國特色嘅小店，將我呢個諗法糾正，而且口味亦相當適合香港人口味添...
![]( "201110-01")
|
| 近蘇豪區極有中國特色小店 |
![]( "201110-02")
|
| 全間餐廳都以囍為主 |
呢間紅雙喜裝修極有中國節日氣氛，全間餐廳都係紅色為主，牆上掛上大大小小各種喜慶裝飾，既似中國人過新年，又似嫁女取新抱，就算香港人睇到都覺得特別興奮。加上門口一塊相當搶鏡嘅紅色牌扁，夜晚行過真係點都會吸引到你目光。
![]( "201110-03")
|
| 餐前小食具特色 |
餐廳雖以蘇杭菜為主打，但亦有部份港式菜式及西式甜品供應，明顯唔係正宗，但我覺得只要好食就可以。餐前小食好特別，點心蒸籠內放上幾粒合桃，俾鬼佬開飯前佐酒傾計，的確係別出心裁嘅好選擇。
![]( "201110-04")
|
| 海哲頭口感爽脆 |
雨花海哲頭($64) - 萵筍咬落青翠多汁，口感爽脆，配合同樣爽脆嘅海哲頭真係最佳組合，加埋麻油淅醋微香，醒胃好味。
![]( "201110-05")
|
| 芝士春卷咬落熟口熟面.... |
香炸芝士春卷($60/4條) - 大大條蘿蔔絲春卷混入芝士，熱辣辣嘅芝士夠晒香滑，食落有少少似去Pizza Hut食芝心批感覺，既飽肚又好味，值得一試。
![]( "201110-06")
|
| 四季豆惹味非常 |
四季豆醬爆豬柳($68) - 近似川菜煮法，將厚身嘅四季豆跟豬柳條一齊落鑊爆，豆香跟肉香配合相得益彰，惹味非常，而且四季豆夠厚身，食落口感相當唔錯。
![]( "201110-07")
|
| 香煎鍋貼令人摸不著頭腦 |
香煎鍋貼($56/8隻) - 餐牌上鍋貼同餃子都標榜係自家製作，而且更加係招牌菜，當然點都要試下。鍋貼底部煎得金黃酥脆，不過肉饀部份較平庸，肉汁未夠豐富，絕對摸不著頭腦點解可以做招牌菜，實在莫名其妙...
以食物質素，服務水平同呢區價錢收費黎講，紅雙喜都算應有水準。雖則小店目標顧客以外國遊客為主，但以其特色裝修同風味，絕對值得一試。
紅雙喜
中環蘇豪士丹頓街48號地下
============================================
感謝 kent1012 提供以上資料
kent1012http://www.kentxfood.com/
============================================
