天氣嚴寒，要暖暖身體，除左食火鍋蛇羹煲仔飯外，日式燒肉亦係一個相當唔錯嘅選擇。人氣店牛角依家訂位都要去到三月先有得食，LCX分店又未開，真係等得黎都餓死啦！所以倒不如俾多少少錢，食個更好的。位於銅鑼灣金利文嘅和幸，雖然跟日本名牌星級食店無關係，但食物質素及服務，絕對唔會輸蝕俾伊呂波！
![]( "150111-01")
|
| 佈置成傳統日式居酒屋，座位寬敞 |
食店佈置跟傳統日式居酒屋一樣，環境雖然無驚喜，但總算座位寬敞，無論吧檯位定係卡位，都一樣坐得舒服。
![]( "150111-02")
|
| 赤豚肉配荔枝，多一份清香 |
餐牌內款式非常多，有禮嘅侍應一輪介紹後，終於點左唔少菜式。先黎一個赤豚荔枝燒，豚肉跟荔枝呢個組合，自年前在八王子食過之後，回味無窮，可惜今日八王子已再無呢樣供應。赤豚肉口感豐富，配上荔枝後感覺少一份油膩，多一份清香，未試過嘅朋友真係要試下喇！
![]( "150111-03")
|
| 厚切牛舌質感豐腴 |
中意食牛嘅朋友，牛舌肯定會係你至愛之一，厚切就更加令人著迷，搞到我價錢都唔記得mark低。牛舌燒香後，外層微脆，內裡質感豐腴，非常好味。
![]( "150111-04")
|
| 牛胸腹肉味較濃，好食！ |
食日式燒肉，肉味較濃嘅牛胸腹肉係我必然之選。呢度用煤氣爐燒烤，比炭爐更易控制火侯，對食客來講少一點花巧，多一點實際。牛胸腹就用猛火去烤，肉汁可以緊緊鎖住，食落油香豐盈，非常精彩。加上黑毛和牛胸腹肉只係賣$108，實在無不試嘅理由。
![]( "150111-05")
|
| 肉味濃香夠Juicy，加埋半價實在頂瓜瓜！ |
除左牛胸腹肉之外，侍應推介當日有牛肋骨半價百幾蚊，非常吸引，二話不說就叫來一客。牛肋骨瘦肉中夾雜着少量油脂，食落肉味濃香夠Juicy，咬口亦鬆化，好食。
![]( "150111-06")
|
| 人生有個真正朋友的確好極！飲勝！ |
食日式燒肉的最佳朋友不得不提，我覺得唔係清酒，而係冰凍生啤，食塊肉再大喝一啖啤酒，感覺實在暢快無比。
![]( "150111-07")
|
| 赤豚五花肉食落唔肥膩 |
餐牌上有厚切赤豚五花肉，在牛肉充斥之下，特意叫一份用黎「溝貨」。五花肉賣相唔錯，厚切肥瘦相間，食落唔覺得肥膩之餘，軟滑中更帶一點爽口，味道唔錯。有心「溝貨」的話，呢份赤豚五花肉絕對值得試下。
![]( "150111-08")
|
| 多汁有嚼勁，佐酒一流 |
燒砂肝亦係我每次食日式燒肉必點選。講起「砂肝」一詞幾有趣，砂肝唔係雞肝，係雞腎。但雞腎亦唔係腎臟，而係胃部，日本人叫其做砂肝，因為佢係雞嘅砂囊 (肌胃)。所以我地可以叫做食「燒雞胃」。呢件「燒雞胃」有嚼勁得黎又不會過硬，食落多汁好食，推介！
![]( "150111-09")
|
| 好唔好食，考你功力... |
食得肉多，想有澱粉質到肚，本來用燒肉蓋飯係好精彩美味，但見到有燒年糕，念頭就順勢改左。將年糕放上火爐慢慢燒香，燒至微焦就可以搽一層醬油再燒，外面香脆而內裡半溶，未試過嘅朋友就真係要試下，至於好唔好食就睇個人功夫，我...今次失手，燒得過焦... 哈哈！
![]( "150111-10")
|
| 必試推介！和幸燒芝士餅！ |
![]( "150111-11")
|
| 燒埋呢邊就食得，好味到爆！ |
食完精彩正餐，無甜品結尾始終會有遺憾。翻看餐牌甜品部份，見到有個和幸燒芝士餅，旁邊更有推介牛圖案，好奇心作祟下叫了一客，上檯時賣相平平無奇，跟莎莉蛋糕非常相似，原來好戲在後頭...侍應待我影完相之後，將芝士餅放上煤氣爐上慢火燒，之後翻去另一邊再燒，兩邊微焦就食得，經燒過後芝士味特別濃，芝士香味即時升，餅身鬆軟好味，包你一試難忘。其實大家BBQ 時，亦可以試下買芝士蛋糕放上網面燒，效果可能有異曲同功之妙。
整體黎講，在香港日本燒肉店中，我對和幸印象分都幾高。和幸定位屬盛八之上，伊呂波之下，所以質素絕對有一定保証。四人晚餐，埋單八百幾，真係算抵食。如要追求更好味道的話，可能和三昧較適合你，如果要睇價錢出發，俾心機到牛角門口排隊吧！
和幸日本燒肉料理
銅鑼灣謝斐道496號金利文廣場3樓
============================================
感謝 kent1012 提供以上資料
kent1012http://www.kentxfood.com/
============================================
