不浪漫的蘭桂芳屠房

Bistecca呢度主打售賣來自美國、澳洲牛肉，跟其意大利名字似乎無半點關係。餐廳門外一張砌肉檯及一部砌肉機，正是門外知客招呼客人的一張工作檯，配上冰冷的白色磚牆，簡單又有趣。餐廳門外另一邊箱，眼見到就係呢度做Dry Age牛扒雪櫃，呢個雪櫃合乎資格與否我唔太清楚，因為我無真正見過外國正宗果啲，但我知道香港有做Dry Age牛扒嘅地方並唔算好多，呢間水準係絕對無問題的～
廚房另一邊牆上，掛滿好多把牛肉刀，好似外國果啲Butcher shop咁，當然唔係大家在街市見到果啲啦，其實好想問清楚佢地呢十二把刀到底有咩分別，不過見到所有侍應都好似好忙咁，無謂問喇～哈哈！


雪櫃內一份份厚身又大份嘅牛扒，真係愈睇愈肚餓



牛肉刀陣～！

 講起呢度嘅侍應，全部都係洋人，佢地見我四圍影相都問我會唔會放上openrice，我笑笑口話會，佢地突然好開心咁大叫: "I Love Openrice!"，態度親切又鬼馬風趣，跟一般高級扒房果類身穿「踢死兔」嘅侍應，明顯地無咁拘緊，而且呢度裝修簡單得黎好舒服，令人食得相當開心自在...


環境舒適

  講返呢度嘅午餐，價錢百幾至二百元左右都有，全部都係包自助式前菜及甜品。不過SET LUNCH無牛扒供應，所以不作考慮之列，當然我當然都會「參觀」一下～以呢度嘅前菜陣容黎講，絕對唔係普通水準咁簡單，而且有沙樂美腸同埋Parma Ham任食，真係見到都已經流晒口水～～


前菜陣容，無比精彩

 未食主菜之前，先試下呢度嘅Table Bread，新鮮焗出來嘅橄欖包，直徑跟一磅蛋糕差唔多，份量唔惹少。橄欖包外層焗得香脆，入面食落鬆軟好味，絕對非食不可！


橄欖包好食到不得了

 今次我選擇左美國Dry Age西冷牛扒，足12安士重，盛惠$278一份。其實大家或者會問咩係Dry Age，其實Dry Age係一種高級熟成方法，主要令牛肉產生蛋白酵素，分解軟化其肌肉纖維，令肉質變腍，入口先會軟綿可口，肉味更濃。由於DA後肉塊會收水縮細，而且熟成成本亦相對較高，所以DA牛扒價錢亦較貴。侍應為我換上較鋒利嘅牛扒刀後，清脆地將呢份Medium Rare西冷中間切開，絕無拖泥帶水。切開後，香味四溢，炭燒味跟肉香味一擁而上，教人著迷。牛扒外層烤紋分明，邊位微焦，入面嫩紅吸引，真係睇到都流晒口水。


烤紋分明，令人著迷



邊位微焦，入面嫩紅，水準頂級！


食落去果瞬間感覺到咩叫做鬆化，同時亦感覺到香濃肉汁在口間爆發嘅感覺，實在非筆墨所能的形容的精彩！加埋西冷邊位果個我至愛果個充滿油脂嘅筋位部份，真係好食到感動流淚！如此級數嘅牛扒，呢個價絕對係超值！如果中意食Rib Eye嘅朋友，呢度14安士一份都係$348咋！

如果中意食澳洲和牛嘅朋友，呢度有個10安士和牛SET可以俾你選擇。同日本和牛相比，澳洲和牛偏向肉味濃郁，食落無日本和牛果種澎湃油脂香味，各自各精彩。呢度燒和牛賣相亦非常吸引，外邊僅熟，內裡嫣紅，火侯掌握得好好... 掂！食落感覺到質素非常高，鮮嫩鬆化，肉味豐腴，非常好食。不過要我跟DA美國冷相比，我都係覺得西冷較適合我口味，和牛...我始終都係中意日本嘅多啲，無論鐵板燒或霜燒都無問題！


和牛火侯掌握得好

 

鮮嫩鬆化，肉味豐腴

 呢餐食得滿足，飽得差不多不願企起身，餐廳話事人話請我食呢度嘅甜品，叫我去甜品Buffet Corner任選，真心多謝晒！不過我真係已經好飽，我只係淺嚐呢度嘅芝士餅。芝士餅上面有燒香嘅焦糖，有少少似Creme Brulee咁，食落好香，實在估唔到扒房甜品竟然都有如此水準，值得一讚！


甜品Buffet Corner



芝士餅有驚喜


在香港要食牛扒，係一件非常容易的事，但在香港要食一份高質素牛扒，比起食優質日本料理更難，而且價錢更加是一個可觀數字，如果大家唔想大破慳囊的話，不妨退而其次，在午餐時間黎Bistecca食一份DA牛扒，絕對係一件樂事。呢度雖然無其他扒房嘅浪漫情調，但超價價錢食到優質牛扒，再加上貼心服務，絕對值得介紹。



Bistecca Italian Steak House
中環蘭桂坊15號協興大廈2樓

============================================

感謝 kent1012 提供以上資料

kent1012http://www.kentxfood.com/

============================================