深水埗舊區一到晚上，總有幾個街角燈火通明，熱熱鬧鬧，原因當然都係離不開一個食字。呢區除左兩間小菜王之外，增輝大排檔亦都係另一間值得捧場嘅食店。今次經驗，雖然唔會有非吃不可，回味無窮嘅經驗，不過呢類港式風味嘅食店近期幾受我愛戴，所以特此到來紀錄一下，同大家一齊分享...
![]( "081010-01")
|
| 炭燒BB豬燒得夠香 |
![]( "081010-02")
|
| 呢隻豬都幾肥美... |
炭燒BB豬($388/隻) - 增輝頭號名物，而且每晚供應有限，要食就一定要預定。一隻BB豬足夠6人份量，至於你話抵唔抵食就見仁見智，但在門外用炭爐即場表演燒豬就絕對係風味十足...燒豬皮燒得香脆好味，咬落去卜卜聲，好味，用黎佐酒真係好爽，不過呢隻BB豬算係幾肥美，瘦肉部份相對較少，怕肥肉嘅朋友可以真係一件起兩件止...
![]( "081010-03")
|
| 胡椒豬肚浸花甲尚算不俗 |
胡椒豬肚浸花甲($88) - 如果近期唔係迷上連粵日嘅柚子酒煮花甲的話，增輝嘅胡椒豬肚浸花甲應該會贏取多一點分數。花甲大隻爽甜，湯底胡椒味恰到好處，好味又暖胃。不過豬肚就略嫌較韌，要扣返少少分，所以都係贏取唔到我嘅歡心...哈！
![]( "081010-04")
|
| 鬼馬炸油條香口又唔油膩 |
鬼馬炸油條($58) - 呢味菜同樣係鎮店之寶，脆口嘅油炸鬼入面，包住彈牙墨魚膠，再落少少甜酸汁，食落既香口又夠開胃，而且又唔覺得油膩，推介！
![]( "081010-05")
|
| 百花釀QQ蛋賣相差少少 |
![]( "081010-06")
|
| 好彩味道搭夠....掂！ |
百花釀QQ蛋($68) - 呢個炸皮蛋講真賣相就真係粗糙左少少，不過呢度唔係做鬼佬生意嘅中菜館，大家唔駛太在意呢樣野吧...雖然皮蛋唔係糖芯，但依家無損味道，外層入口好香脆，中間蛋部份有光澤，呈透明茶褐色，質地柔韌具有彈性，食落去亦無嗆鼻嘅化學味道，蛋香慢慢滲出，好食。
如果以平民食館作招徠，增輝價錢上未夠容記小菜王來得草根。但個別菜式而言，亦有其吸引之處，尤其係鬼馬炸油條，做得真係幾出色，值得一試！
增輝大排檔
深水埗石硤尾街38號
============================================
感謝 kent1012 提供以上資料
kent1012http://www.kentxfood.com/
============================================
