我對海南雞飯素來情有獨鍾，不過喺香港要搵到好食嘅，五隻手指數得晒(當然無計果間泰國人海南雞)。而喺尖沙咀柯士甸路舊樓後巷入面，有一間店舖格局非常簡單，專賣新加坡海南雞嘅叫「文華雞飯」 小店，估不到呢間隱蔽食店，竟然令我一食就愛上了...
![]()
|
| 店舖格局非常簡單 |
文華雞飯店舖面積好細，內裡只有四張二人檯，出面亦只有幾張圓檯。我來到時剛剛開門，來自新加坡嘅友善老闆娘叫我等一陣，而我亦只好先在門外附近影相先...
其實文華雞飯唔太難搵，沿柯士甸道轉入柯士甸路，天香樓斜對面就會見到一條窄巷，穿過果條窄巷就會見到天井同埋間舖，又或者你知九龍區著名「蛇竇」聯威茶餐廳位置，就一定搵到...
未入後巷前大家可以抬高頭，有個好明顯嘅指示牌，絕對唔會搵錯，除非你....哈哈！
第一次黎到呢度當然要試食傳統海南雞飯餐($33)，價錢唔算貴，加多$3有飲品，而加$5有細肉骨茶添...不過只可以二選其一，我已叫老闆娘將餐牌上面果個逗號改走，無謂被人誤會而俾人話搵笨...
![]()
|
| 清湯 |
主菜未到先送上一碗熱辣辣嘅清湯，表面上只係一碗得幾塊椰菜，平平無奇嘅茶記例湯，但飲落去原來係鮮甜味美嘅雞湯，怪不知咁好味啦～！
![]()
|
| 肉骨茶 |
我一向唔中意食藥材味重嘅食物，但呢度嘅肉骨茶卻意外地接受。老闆娘話香港人普遍唔太接受傳統肉骨茶果種濃烈藥味，佢地加入黑胡椒一齊煮，將藥味溫和左，聞落亦再無濃烈嗆鼻感覺。加上份量十足，豬肋骨肉，腐皮同豆卜樣樣齊，唔錯唔錯！
![]()
|
| 三色醬 |
食海南雞，三色醬絕不可缺。三款大大盤放你面前任你落，絕不吝啬。呢度黑醬油質地比普通嘅較thick，味濃又帶甜，送飯一流。甜酸醬辣味較出，酸味較少，食起上黎幾滋味，而薑茸相對就較為失色，可以不理。
![]()
|
| 海南雞飯 |
海南雞飯可以指定要唔同位置，要雞脾唔駛另外加錢，當然係落單果陣要預早出聲啦！無骨海南雞飯送上已聞到油飯香味，望落雖然光澤不足，但食落味道豐富，飯粒極有咬口，絕對好味，一問之下原來煮飯時用上雞湯再加獨門秘方，哈哈～神秘有趣...實在好味！
![]()
|
| 海南雞 |
雞肉質嫩滑非常，雞皮又滑溜，皮下脂肪部份豐滿，食落唔油膩，好好味！以呢個價錢黎講，質素絕對係接近超班，掂呀！
![]()
|
| 珍珠奶茶 |
珍珠奶茶味道唔太甜，珍珠Ｑ度十足，質素絕對比起好多台式飲品店高，加$5就有杯又真係幾抵飲！
![]()
|
| 燒雞 |
食完雖然好滿足，但老闆臨走前幾句說話為我帶來少少遺憾...佢話其實佢地最出色嘅唔係無骨海南雞，而係呢隻燒雞，佢地在新加坡賣燒雞同白雞嘅比例係8:2。唉～唯有希望下次再黎試下呢度嘅燒雞飯...
P.S. 出文前突然見到呢間小店在OPENRICE突然人氣急升, 大家想試就快喇~!
文華雞飯（新加坡）尖沙咀柯士甸路15A柯士甸大廈D舖 (舊址)尖沙咀山林道54號利雅商業大廈地下 (新址)
============================================
感謝 kent1012 提供以上資料
kent1012http://www.kentxfood.com/
============================================
